Liverpool-in Chiesa lalut dawn lo

Euro 2020-a Italy champion theih nana player pawimawh Federico Chiesa chu Liverpool-in lakluh duh mah se an lalut thei dawn lo niin a lang.

Italian chanchinbu La Repubblica chuan Reds hian euro maktaduai 100-in an dawr a, Juve chuan hei hi an hnar nghal niin a tarlang–Italian journalist lar Fabrizio Romano chuan thudik tawk lo a nih thu a sawi thung.

Romano chuan, "Thuthang awm mah se Liverpool-in Chiesa hi lakluh tumin an dawr lo a, Chiesa hi club dang tan leichhuah theih a ni lo bawk.

"Liverpool board lam chuan Juventus dinna an hrechiang a, Italian club hian 'khawih thiang lo' ang hialah an player hi an dah. Bayern Munich pawhin hei hi an hrechiang," a ti.

European transfer bazar-a rin hlawh ber tih ngam Romano ṭawngkam aṭang chuan Liverpool-in Chiesa duh mah se hnar an ni dawn tho tih an inhriat chian avangin an dawr lo niin a lang a, Bayern pawhin duh mah se a thlawna tha sen an tum lo.

Kum 23 mi Chiesa hi a nihna takah chuan Fiorentina player ni mah se Juve hian season hnih chhung atan loan-in an hawh mek a, a loan zawhah a ngheta lei turin thuneihna an nei bawk.

Euro khelh zawh takah khan Chiesa hian match sarih khelin goal hnih a khung a, season hmasa khan Juve tan inelna hrang hrangah match 46 khelin goal 15 a khung a, assist vawi 11 a nei bawk.