Season thar hmachhawn turin Manchester United an inpeih tawh em?

Manchester United-in nipui transfer-ah player langsar Jadon Sancho an lakluh hnuah Raphael Varane an lalut leh dawn a, season thar hmachhawn turin an inpeih tawh em tih hi zawhna awm thei tak a ni.

Tlarhnung
Man United-in an club academy chhuak goalkeeper Tom Heaton chu season hnih atan contact an ziahpui a, Aston Villa tana khelhna hmun chang pha lo keeper hi Man United-in squad tih chhah nan an hmang ang.

Ole Gunnar Solskjaer-a'n thutlukna siam tur a la nei tho, Dean Henderson nge David de Gea a rin zawk dawn tih hi a la chiang lo. Spanish keeper hi a hlawh a tam avangin chhuatir a harsa dawn a, chutihrualin Man United-in competitive match an khelh hnuhnun ber Europa League-ah a inlan tih hriat a ṭha.

United keeper pahnihte hi Euro 2020-ah ram tan an inlan pha lo ve ve a, Henderson hi inhliam vangin England squad aṭangin a inhnukdawk. Tlarhnungah Alex Telles-a'n training-naa inhliam vangin season ṭantira a inlan thei dawn lo a, Luke Shaw a awm avangin buaina tur a awm lo ang.

Right back-a awm Aaron Wan-Bissaka-a'n goal nawr a pui ṭha tawk lo a, Solskjaer-a'n season ṭan hmain thutlukna a tihchian a ṭul dawn, Man United hian sum an seng ngam a nih chuan Kieran Trippier lak theihin a awm. Chutihrualin Diogo Dalot pawh an la kawl a, amaherawhchu Portuguese defender hi Bissaka aiin attacking ṭha mah se a defending a ṭha lo zawk. Dalot hmalam hun a chiang lo a, defender dang Brandon Williams, Axel Tuanzebe leh Phil Jones te pawh chhuak thei an ni.

Pogba hi...
Paul Pogba-a'n kum khat chiah contract a nei tawh a, French midfielder hian contract a pawhsei si loh avangin tun nipuia a chhuak lo a nih chuan season tawpah 'free transfer' in an chhuak dawn.

Sum dinhmun thlir chuan Man United tan Pogba chhuahtir a dik a, chutihrualin khawvel midfielder ṭha ber zinga chhiar tel a nih miau avangin season thara nomawi chawi tum tan chuan thutlukna siam harsa tak a ni ngei ang.

Pogba chungchang hi club thuneituten an chinfel ran a ṭul dawn. Man United hian tlarhma pui turin Bruno Fernandes nei mah se tlarhnung pui tura an neih Fred, Scott McTominay leh Nemanja Matic te hi champion pui turin an ṭha tawk em tih inzawh nawn an mamawh ang.

Season liam ta tawp lama West Ham tana khel ṭha Jesse Lingard bakah Facundo Pellistri, Amad Diallo leh Donny van de Beek te hian Solskjaer-a ngaihtuahna an tibuai pha bawk ang. Man United hian nizan khan friendly match-ah Brentford an hmachhawn a, Preston leh Everton nen an la inkhel leh dawn. Season thar hmachhawn hmain Man United-in chinfel tur an la nei a, thla chanve hun an la nei e.