Man United leh Real Madrid ten an nemnghet

Thawhlehni zan khan Manchester United leh Real Madrid ten Raphael Varane chungchangah inremna an neih thu an puang. FIFA World Cup-a France champion puitu defender hian medical neih a la hmabak thung.

English club hian Varane manah hian pound maktaduai 34 an pe phawt ang a, a chet ṭhat dan a zirin pound maktaduai 42-ah a pung chho thei dawn. Kum 28 mi Varane hian kum li daih contract a ziak ang a, kum khat atan a pawhsei leh theih bawk ang.

Real Madrid chuan, "Kum 10 chhunga club tana a hnathawhah hian kan lawm a, club a ti hming ṭha hle. Kan club-a a awm chhung hian nomawi 18 : Champions Leagues (4), Club World Cups (4), European Super Cups (3), La Liga titles (3), Copa del Rey (1) leh Spanish Super Cups (3) kan chawi. Real Madrid chuan Raphael Varane leh a chhungte an chona thar hmachhawn tur atan duhsakna kan hlan," tiin an player an thlah.

Varane hi Lens academy aṭanga inzir chhuak a ni a, kum 17 mi a nihin first team tan a khel ṭan. French club hi Ligue 1 khel zel thei turin chhan thei lo mah se Europe club lianten an inchuh a, Man United pawhin na taka an chuh nachungin kum 2011 khan Real Madrid a pan a, kum ruk atan contract a ziak.

Los Blancos-ah hian Jose Mourinho hnuaiah bul ṭanin inelna hrang hrangah match 15 a khel a, La Liga nomawi an chawi. Carlo Ancelotti hnuaia Real Madrid-in a vawi 10 nana Champions League nomawi an chawi khan Europe inelnaah hian vawi sarih a inlan a, final-a Atletico Madrid 4-1 a an hneh ṭum khan Varane hi Ramos nen defence laiah an inkawp

Rafael Benitez hnuaiah hun rei an khel lo a, Benitez thlaktu Zinedine Zidane a hnuaiah Champions League nomawi vawi thum chawi ṭum khan Varane hi player pawimawh a ni. Chutihrualin inhliam vangin Euro 2016 a khel thei lo a, France-in final-ah Portugal an hneh lo. World Cup 2018-ah Les Bleus tan minute zawng zawng zawng khel vekin FIFAWorld Cup nomawi an chawi.

Manchester United tan tawnhriat nei ṭha Varane an lalut thei hrim hrim hi chanchin ṭha a ni a, French defender manah hian pound maktaduai 42 seng ta pawh ni se transfer ṭha tak a ni hrim hrim.

English club hian 2018-19 season khan Premier League-ah goal 54 an chhuah a, hemi hnu hian Harry Maguire leh Aaron Wan-Bissaka te an lalut. Defender an thuam ṭhat hnuah United result-ah hmasawnna awmin 2019-20 season-ah goal 36 chauh an chhuah a, pathumna an ni.

Season liam ta khan Man United hian goal 44 an chhuah a, an elpui Manchester City aiin goal 12-in an chhuah tam zawk. Maguire a kawppui Victor Lindelof hi boruakah a ṭha tawk lo a, tuna Man United lakluh Raphael Varane hi La Liga defender zinga boruaka ṭha ber a ni a, Ole Gunnar Solskjaer hote hi an tlarhnung a phui sawt turah a ngaih theih ang.