Rilru lam kaihhnawih vangin Biles inhnukdawk

Infiammi hlawhtling berte zinga mi, Olympic gold medal ringawt pawh pali la tawh Simone Biles chu Tokyo Olympic 2020 aṭangin a inhnukdawk - individual all-around final hial thleng tawh mah se, rilru lamah harsatna a neih avangin inelna a hmachhawn zui dawn lo.

Rio Olympic-ah khan hlawhtling takin Biles hi a lo inlan tawh, khawvel huap Gymnastics inelna hrang hrangah pawh hlawhtlinna a chang hnem tawh hle. Mahse, Tokyo Olympic neih hma pawh khan mimal nun harsatna a lo nei ve fo tawh.

USA Gymnastics chuan thuchhuah siamin, "A hriselna dinhmun endik a nih hnuah Simone Biles chu individual all-around competition aṭangin a inhnukdawk, a rilru lam hriselna a ngaih pawimawh vang a ni," an ti.

Beiseina sang tak nen Japan khawpui an pan thei a, an ram USA tan medal a hlawhchhuah leh ngei pawh a rinawm. Mahse, inelna peng pakhat 'vault' ah a tih ṭhat tawk loh avangin titi a ti tam, a hnuah team competition aṭangin a inhnukdawk.

Team inelnaah hian USA hi Russia hnuaiah awmin pahnihna dinhmun an luah. Mimal leh a team telna nena belhkhawm chuan Biles-i'n Olympic medal paruk a neihna a ni a, world championship nena belhkhawm phei chuan medal 30 a nei tling hial.

A duhthusamin che ṭha nghal lo mah se mimal inelna lamah erawh medal a lak a la rinawm cheu, individual final hi chi ngaah a lut! Khawvel ngaihven a hlawh laiin a inel chhunzawm loh tur thu a sawi ta zawk a, a hmun ruakah Jade Carey a inlan thung ang.

Kum 24 mi Biles chuan, "Ka chet dan zawng zawng ka chhut let a, chhunzawm turin dinhmun ṭha takah ding mah ila ka thei lo. Tunah chuan infiamna aiin ka rilru lam hriselna ka ngaih pawimawh a ngai, inrintawkna ka nei rih lo a ni," tiin a hun tawn chungchang a sawi.