Semifinal-ah Svitolina

Elina Svitolina chuan Tokyo Olympic 2020 neih laiah medal a dawng ngei dawn niin a lang ta. Ukrainian nula hian nimin khan Camila Giorgi hnehin hmeichhe tennis huangah semifinal a lut, medal hlawh chhuak turin match khat chak a la hmabak.

Seeded palina Svitolina hian quarterfinal-a a khingpui Italy nula hi 6-4, 6-4 in a hneh a, semifinal-ah chuan Naomi Osaka pawh lo hneh tawhtu Marketa Vondrousova a hmachhawn leh ang - inkhel hautak a ni dawn.

Nimin inkhel dangah Vondrousova hian Spanish player Paula Badosa chu 6-3 in a hneh. Badosa hian khaw lum vangin set khat bak a khel zo thei lo. Tennis court a chhuahsan dawnah pawh a chau a, wheelchair hmanga nawr chhuah a ngai hial.

Kum 26 mi Svitolina chuan, "Olympic hi ka ngaihlu hle, kan ram Ukraine-ah phei chuan Grand Slam aiin kan dah sang zawk, chuvangin ka tan chuan semifinal thlen phak hi a ropui tawh hle. Medal hlawh chhuak ngei tura beih ka tum," tiin a sawi.

Tennis inelna huangah chuan Grand Slam hi ngaihhlut ber a ni, chumi dawtah chuan 1000 Masters an ngaihlu leh, world ranking point an pek danah chuan Masters Tournament leh Olympic hi a intluk. Mahse, Olympic erawh ram inelna a nih avangin a boruak a danglam.