Dean Smith chungah ka lawm reng ang - Terry

Aston Villa assistant coach aṭanga chawl hlim John Terry chuan Villa boss Dean Smith chungah a lawm reng tur thu a sawi a, "I laka ka ba hi ka rul seng ngai lo ang," a ti.

Chelsea legend Terry hian October 2018 khan Smith-a coaching staff chu zawmin, kum 2019-a Premier League an inpetkai theih nan tha a thawhhlawk hle.

Terry chuan, "Coach, he club ropui taka ka coaching career ṭanna hun min hawnsak avangin i chungah ka lawm reng ang," a ti a, "I kianga hun ka hman minute tin mai kha nuam ka tiin i hnen aṭangin thil tam tak ka zir a ni," tiin a sawi zui.

English defender piang tawh zinga ṭha ber pawla mi Terry chuan, "Dean, i club hmangaih em em tana kan hnathawhte kha ka chhuang hle a, Aston Villa hian ka thinlungah hmun pawimawh a chang reng dawn a ni," a ti.

Villa Park-a chhuahsan hnuah Terry hian coaching-a a hmachhawp neihte a sawi bawk a, kum tir khan Bournemouth leh Celtic nen sawizawm ni mah se club pahnih hian coach an nei tawh.

Terry chuan, "Tunah rih chuan ka chhungte bula hun hman phawt ka duh a, chumi zawhah chuan Europe-a club leh manager-te tlawh kualin manager nih ka tumna kawnga inzir nan hun ka hmang dawn a ni," a ti.

Dean Smith chuan, "Ka coaching staff zinga John a awm tawh lo tur hi pawi ka ti a, mahse, a thutlukna hi ka hrethiamin ka zahsak a ni. Tun hnaia kan club hlawhtlin nana thawhhlawk tak a ni a, engtiklai pawha min thlawp tlattu a ni.

"Ama theihna avang liau liauin world class manager a la ni ang tih hi ka ring tlat a, a hma hun atan duhsakna sang ber ka hlan a ni," a ti.

Smith leh Terry hian Villa chu Premier League an kaipui bakah League Cup (2019-20) final an luhpui a, top flight football an kir leh hnua an season hmasa berah a tawp niah inhamtang hram mah se season hmasa erawh 11-na ni chungin an khar thung.