Ball tauh theih zat bituk a ni!

English football-ah ball tauh theih zat siam thar a ni a, footballer-te chu training-naah kar khat chhungin 'higher force' hmanga ball kal reng reng vawi 10 aia tam tauh phal a ni lo.

Football-a ball kal, 'higher force' tia an sawi hi long ball (35 meter aia thui), cross, corner leh free kick aṭanga ball kalte hi a ni a, chumi awmzia chu hetiang ang aṭanga ball kal reng reng chu player-ten kar khat chhungin training-naah vawi 10 aia tam an tauh a thiang dawn lo tihna a ni.

He dan thar hi professional footballer-te tan chauha tih a ni lo a, amateur player-te pawhin an hman ngei tur a ni - non-league club lam player-te pawhin an zawm a ngai dawn tihna a ni a, an khauh hle.

Inkhelh laia ball tauh hian thluak lamah nasa takin harsatna a thlen thei a, hei hi mithiam tam takin zirchianna an kalpui tawh a, kum 2019-a zirchianna pakhat chuan professional footballer-te tan 'neurodegenerative brain disease' neihna chance a sang tih a tarlang.

Football Association, Premier League, English Football League, Professional Footballers' Association leh League Managers Association-te chuan thuchhuah inṭawm siamin, "Zirchianna aṭanga a lan danin ball tauh tam zawk hi 'low force' aṭanga kal a ni.

"Chutiang a nih avang chuan 'higher force' lamah inkhuahkhirhna dan kan kalpui phawt ang a, kar khatah training naah vawi 10 aia tam nei lo turin kan inngen a ni. He rawtna hi player-te him zawk nana tih a ni a, zirchianna dang kalpui zel pahin dan hi ennawn zel tur a ni ang," an ti.

'Neurodegenerative brain disease' hi 'central nervous system' (thluak leh spinal cord, kan taksa leh rilru 'control tu) an tiha cell-te an lo chhiat emaw cell thi a lo awma natna thleng thei a ni a, Alzheimer leh Parkinson kan tihte hi a natna lanchhuahna langsar an ni.

Kum 2019 khan Glasgow University-a mithiamte chuan dementia (thluak lam natna) avanga thihna 'chance' chu mipui vantlang aiin professional footballer-ten an nei sang zawk niin an sawi a, hetah hian player thi tawh 7,676 leh mipui vantlang thi tawh 23,000 aṭangin zirchianna an nei a ni.

Premier League chuan January thla khan lua hliam tuar player an awmin, substitution siam zawh vek tawh pawh ni se, substitution pahnih siam theihna dan thar a siam a ṭul dan a zira tun season-a hman tlang theih turin an ti.

Premier League chuan hei hi tun season-ah a hman chhunzawm dawn a, player zingah lua hliam tuar an awm chuan, substitution hman zawh pawh ni se, la chhuakin, an aiawh tur luhtir a ni thei dawn tihna a ni.