USA thinrim tuartu Iran

Tokyo Olympic 2020 an match hmasa berah United States mipa basketball team an chak lo a, a sawhkhawk chu na tak a ni. Nimin khan USA hian an group match pahnihna khelin Iran chu 120-66 in an sawp.

A zawna Olympic match 25 chak thei US hi an kaltluang lai France lakah a tawp a, sawisel pawh an hlawh nghal. Mahse, insiamṭha nghalin an player paruk ngawtin point 10 chuang an nei thei, chak turin harsatna an tawk lo chiang hle.

Damian Lillard-a'n point 21 neiin a lut hnem ber a, ani bakah hian point 16 a neih baka rebound vawi nga latu Devin Booker a khel ṭha bawk. US team pumpui hian 3-point vawi 19 ngawt an vawm lut.

Olympic hnuhnung pathuma champion vek US hian Inrinniah Czech Republic an hmachawn leh dawn, an chak a nih chuan group A aṭangin knockout round an lut chiang dawn a ni.

Group match hnuhnung ber hi Kevin Durant tan record thar siam theihna hun a ni dawn. Durant hian Iran lakah point 10 a nei a, an ram tana point nei hnem ber Carmelo Anthony (336 point) umphak turin point ruk chauh a mamawh tawh - a chesual viau a nih loh chuan a khum ang.

Nimin group B lam inkhelah Germany an tho chhuak bawk, an match hmasa zawkah chak lo mah se Germany hian Nigeria 99-92 in an hneh a, hnehna an chan theih nan hian point 19 neitu Johannes Voigtmann a khel ṭha hle.

Australian chuan Group B hma-hruaitu ni turin Italy lakah 86-83 in hnehna an lo chang ve bawk, anni hian an match hmasa lamah Nigeria an hneh tawh bawk avangin quarterfinal lut turin an dinhmun a ṭha tawh.