Olympic Football Ivory Coast-in Germany an pet tla

Nimin khan Olympic mipa football-ah Germany leh Ivory Coast te 1-1 in an inhnehtawk a, Rio 2016 silver medalist tan knockout stage-ah hmun a awm lo. Olympic-ah hian group khat aṭangin pahnih zelin quarterfinal an lut a, group D aṭangin Brazil leh Ivory Coast te an tling.

Champion lai Brazil hian an match hnuhnung berah Saudi Arabia 3-1 in an hneh a, Everton forward Richarlison-a'n goal hnih a khung bakah Matheus Cunha-a'n a khung ve bawk.

An inhnehtawk
Germany tan captain Maximilian Arnold a rawn let a, Ivory Coast lamin Manchester United rawlthar Amad Diallo chu bench-ah an dah thung. Stefan Kuntz hote tan knockout stage lut turin chak ngei a ṭul a, African team tan draw a tawk.

Chak mammawh Germany-in an nawr na nghal a, left back David Raum-a cross chu Eintracht Frankfurt forward Ragnar Ache-a'n tauh hman mah se crossbar chungah a kal. Hemi hnu lawk hian Max Kruse-a'n corner aṭanga a chance ṭha hmuh chu a hlah bawk.

Ivory Coast lamin counter attack hmangin chance a nei a, minute 22-naah Fiorentina forward Christian Kouamé-a'n keeper chauh hmachhawn mah se goal zawnah a pet thei lo.

Minute 69-naah throw in aṭanga ball kal chu Germany tlarhnungin an clear thei lo a, Youssouf Dao tlawh hmain Benjamin Henrichs-a'n tlawh hram mah se an lamah a tlawh lut.

Germany-in chak turin goal hnih an mamawh a, substitute Eduard Lowen-a'n minute 73-naah freekick aṭangin mawi zetin a khung. Stefan Kuntz-a hoten goal khat dang khung nan minute 17 la nei mah se goal dang an khung belh thei lo.

Brazil tan Richarlison
Brazil-in an match hmasa berah Germany 4-2 an hneh a, match hnihnaah Ivory Coast nen goal awm loin an inhnehtawk. Saudi Arabia nen an inkhelh ṭum hian minute 14-na lekah Matheus Cunha-a'n corner aṭanga ball kal a tauh lut.

Minute 27-naah Abdulelah Al-Amri-a'n a tauh goal a, Saudi-in siphurh an sut. First half-ah goal dang luh belh lo mah se second half-ah Richarlison-a'n a theihna rawn lantirin Brazil a chakpui. Everton forward hian minute 76-naah Richarlison-a'n a tauh lut a, injury time-ah Brazil goal thumna a khung leh bawk.

Kum 24 mi Richarlison hian Olympic mipa football-ah hian goal nga a khung tawh a, top scorer a ni mek.