South Korea-in goal an surtir

Olympic football-a knockout round lut turin South Korea-in chak an mamawh a, Honduras chu 6-0 zeta sawp chungin group B-ah hmahruaitu an ni.

South Korea tan Hwang Ui-jo chuan goal thum khungin hattrick a siam a, Bordeaux forward hian goal hnih hi chu penalty aṭanga a chhuih luh a ni thung.

Season hman zawh taka Ligue 1 lama goal 12 khung thei striker hian minute 12-naah penalty aṭangin a khung ṭan a, first half hun pek belhah goal khat dang khungin minute 52-naah penalty aṭang bawkin a khung leh bawk.

Kum 28 mi striker goal khung karah hian penalty hmang vekin Ulsan Hyundai midfielder Won Du-jae chuan minute 19-naah goal khat a thawh ve a, chawlhlawk an hman hian 3-0 a ni der tawh.

Hwang Ui-jo-a'n hattrick a siam hnuah Kim Jin-ya leh Lee Kang-in ten goal khat ve ve an thawh bawk a, Honduras lamin a chhanletna tur an nei lo.

Kum 23 mi Kim Jin-ya hi FC Seoul tana khel lai a ni a, Lee Kang-in hi kum 20 mi lek a ni chungin season hman zawh takah khan Valencia tan inelna hrang hrangah match 27 a khel thei - South Korea hi an hmabak a êng hle.

Group B inkhel dangah Romania leh New Zealand chu goal khung loin an inhnehtawk a, team pahnih hian point li ve ve nei mah se goal difference-a dinhmun ṭha zawk New Zealand an tlang.