Spain hneh lo Argentina an tla

Chak ngei ngei ngaihna inkhelah Argentina chu Spain nen 1-1 in an inhnehtawk a, South American ram hi Tokyo Olympic 2020 neih laia mipa football huangah group stage paltlang zo loin an tla.

La Albiceleste an tlak lai hian - Australia 2-0 a hnehtu Egypt an tling thung. Argentina leh Egypt te hian point li ve ve an hmu a, mahse goal difference nei ṭha zawk Pharaoh an tlang.

Argentina an tla
Nimin tlai Saitama Stadium-a inkhelah Spain tan midfielder Mikel Merino-a'n minute 66-naah goal hmahruai a khung. Real Madrid forward Marco Asensio-a'n hun ṭha nei chhunzawm ve mah se a khung belh thei lo thung.

Argentina tan midfielder Tomas Belmonte-a'n hun tawp hma minute thum chauh awm tawhah si phurh a sut, mahse an mamawh point thum hmuh belh turin goal dang an la mamawh chu an khung belh thei tawh lo.

Barcelona midfielder Pedri awmna La Roja hi champion tura rinkai zinga mi an ni. Amaherawhchu, group match vawi thum an khelh chunah erawh beisei anga ṭhain an la khel lo niin a lang. Quarterfinal-ah chuan group D lama pahnihna Ivory Coast nen an inkhel leh ang.

Kum 2004 khan Argentina hian a vawi khat nan Olympic mipa football-ah gold medal an la. 2008 Beijing Olympic kha Lionel Messi, Angel di Maria leh Sergio Aguero te tleirawl lai niin, an ram tan hian gold medal an lo la tawh bawk - kuminah erawh an tum ram an thleng zo ta lo a ni.

France an tla
Group A-ah France-in quar-terfinal lut turin chak an mamawh a, inelna thlengtu Japan lakah 4-0 in an mualpho. Japan tan ṭum dang thoin Takefusa Kubo a che ṭha a, goal hmahruai a khung hnuah Hiroki Sakai, Koji Miyoshi leh Daizen Maedaten a khung belh.

Inkhel dangah Mexico-in South Africa 3-0 thoin an sawp. Mexico tan hian Alexis Vega, Luis Romo leh Henry Martín tren goal khat ṭheuh an khung a, South Africa captain Tercious Malepe chu hnawhchhuah a ni.