Satish a chak, Mary Kom a tla

Olympic boxing-ah India beisei sanna Mary Kom chuan nimin tlai khan Ingrit Valencia hneh loin flyweight last 16-ah a tla. Vawi ruk world champion ni tawh Manipur boxer hian round hmasa bera a chet ṭhat loh a tuar a, round hnuhnung pahnihah chak ve ve mah se split decision-in a chak lo.

Mipa lamah Satish Kumar-a'n Ricardo Brown split decision (4-1) in a hneh a, super heavyweight (+91kg) category-ah quarterfinal a lut. Uttar Pradesh boxer Satish hian Pathianni chawhma dar 9:36 hian Bakhodir Jalolov a hmachhawn dawn a, hnehna a chang thei a nih chuan medal a la dawn.

Mary a vanduai
Kum 38 mi Mary Kom hi World champion vawi ruk ni tawh a, Olympic-ah erawh 2012 London-a bronze medal a lak bak chhuan tur a nei lo.

Hmeichhe boxing hi Olympic-ah kum 2012 aṭang khan an telh ṭan chauh a, Manipur boxer vanglai erawh a medal lak dan aṭanga tehin 2002-2010 tihin a sawi theih. Hei bakah hian Mary Kom-i World champion nihna hi flyweight ni loin pin weight (vawi li) leh light flyweight (2) te a ni.

Rio 2016-ah Mary Kom a tel pha lo a, tun hnaiah rawn intuai thar 2019 World championships-ah khan bronze medal a dawng. Tokyo 2020-ah hian a fixture a fuh tawk lo a, a khingpui Ingrit Valencia hian 2016 Rio de Janeiro khan bronze medal a dawng.

Theihtawp a chhuah
Kokugikan Arena-ah Colombia boxer Valencia hian bul a ṭan ṭha zawk a, tawnhriat nei ṭha Mary Kom pawhin a khingpui phur ṭha tak hi a chelh thei lo. Judge panga zinga paliin Valencia hi an chaktir.

Second round-ah huaisen takin boxer pahnih an inhmachawn a, Manipur boxer hian a tawnhriat hmang ṭangkaiin an inpawmchilh ṭumah a che ṭha zawk. Judge pathumin Mary Kom an chaktir a, round thumna pawimawh ta hle.

Round tawpna berah pawh an innawr tawn ve ve a, Mary Kom hi judge pathum thoin an chaktir. Amaherawhchu Manipur boxer hian round hmasa bera a chet ṭhat loh a tuar a, split decision (27-30, 28-29, 30-27, 28-29, 29-28) in an chak lo.

India dinhmun
India-in hmeichhe boxer pali an tir a, Mary Kom a tla hmasa ber. Vawiin hian Simranjit Kaur leh Lovlina Borgohain te an inhnek dawn. Assamese boxer Lovlina hian Chinese Taiper boxei Chen Nien-chin a hneh chuan welterweight (69kg)-ah medal a la dawn.

Simranjit Kaur erawh a vawi khat inlanna tur chauh a ni a, zing dar 8:18-ah Sudaporn Seesondee nen an inhmachhawn dawn. Punjab boxer hian hnehna a chang a nih chuan quarterfinal an lut chiah ang.

Mipa lamah boxer panga aṭangin Amit Panghal leh Satish Kumar te chiah an dam tawh. Flyweight category ranking number 1 Amit Panghal hian Inrinni zing dar 7:30-ah Yuberjen Martínez a hmachhawn ang.