India tan chak ngei ngei a ngai

Lalremsiami Hmar telna India hmeichhe hockey team ten beisei an la phak thei lo. Tukin dar 8:15 hian Ireland nen an inhmachhawn leh dawn a, an chak lo emaw an chak zo lo emaw a nih chuan quarterfinal luh beiseina a tawp ang.

India hian an match hmasa lamah - Netherlands, Germany leh Great Britain te an ngam lo. An hneh loh ho hi ram ṭha leh ranking sang an ni, tun ṭuma an hmachhawn tur erawh world number 9 an ni a, number 10 India nen an intiat tawk hle.

Tun ṭumah hian India hi an chak a nih chuan, group match hnuhnung bera an tum tur South Africa pawh hneh an beisei ngam ang. An match hnuhnung pahniha an chak a nih chuan tlang thei an la ni dawn.

India captain Rani Rampal chuan, "Ireland hi team ṭha tak an ni a, chutih rualin kan group-a team awm zingah chuan kan tiat pui ber pawh an niin a lang. Chak tumin theihtawp kan chhuah a ngai dawn a, tihsual neih a thiang tawh lo ang.

"Match hmasa lamah goal khung kan harsat, kan hatsatna hi tunah chuan kan sut kian theih ngei ka beisei," a ti. Rani bakah FIH Rising star of the Year ni tawh Remsiami te goal hmaah an hriam zual a ngai.