Dan theih loh Djokovic

Novak Djokovic chuan Japan tlangval Kei Nishikori chu an tualzawlah ngei a hneh a, infiamna khawmpui lian Tokyo Olympic 2020 khelh laiah semifinal a lut - gold medal dawng turin match hnih chak chiah a hmabak ta.

Nimin quarterfinal inkhelah Djokovic hian Nishikori hi 6-2, 6-0 in a hneh, kuminah match 38 a chak tlinna chiah a ni a, vawi thum chauh chak loh a la nei - player pahnih bik intawn tawhnaah Serbian tlangval hi 17-2 zetin a chungnung.

Tun hnaiah a zawna match 22 chak tawh Djokovic chuan, "A tawp ka la thleng lo, hlen chhuah tur ka la nei. Khaw lum vangin taksa a chau, nitin match kan neih bawk avangin a awlsam lo," tiin a sawi.

Grand Slam vawi 20 champion tawh hian season kal laiah - Australian Open, French Open leh Wimbledon te a la tawh. Olympic gold medal a lak a, season tawp lama US Open title a lak leh bawk chuan 'Golden Slam' a ni thei dawn.

Quarterfinal inkhel dangah, champion tura rinkai Daniil Medvedev chu Spanish player Pablo Carreno Busta lakah 6-2, 7-6 in a chak lo. Russian tlangval Karen Khachanov erawhin Ugo Humbert a hneh a, nizana Alexander Zverev leh Jeremy Chardy te inkhel result kan hre hman lo.

Hmeichhe inelna lamah Switzerland nula Belinda Bencic chuan Elena Rybakina (Kazakhstan) chu 7-6 (2), 4-6, 6-3 a hnehin final a lut. Swiss star hi doubles huangah a inlan bawk a, a ṭanpui Viktorija Golubic nen semifinal an thleng tawh bawk.