Quarterfinal-ah Sindhu a lut

PV Sindhu chuan a zawnin Olympic quarterfinal a lut ta. Indian nula badminton khel thiam hian nimin zing khan Mia Blichfeldt chu 21-15, 21-13 a hnehin Tokyo Olympic 2020 neih laiah quarterfinal a in vaw kai.

Badminton world champion ni lai Sindhu hian vawin chawhnu dar 1:15 hian quarterfinal a khel zui leh dawn, tualchhung nula chhuanvawr Akane Yamaguchi nen an inhmachhawn leh ang - Japan nula nen an inkhel lai hi Sony TV lamah en theih a ni dawn.

A chungnung
Tun hma chuan Sindhu hian Mia Blichfeldt lakah chak loh a nei ngai lo. Mahse, kumin January thla khan Denmark nula hian Thailand Open-ah a hneh nawlh a, an intawn lehna Swiss Open-ah erawh Sindhu bawk a chak.

Season kal laia player pahnih intawn tawhna chu 1-1 a ni. Olympic-ah hian a tu zawk zawk pawh chak thei an ni tih a chiang. World number 18 Mia zawkin bul a ṭan fuh a, game hmasa zawkah point hmasa pahnih a hmu.

Amaherawhchu, Indian suttler a insiam ṭha nghal, a zawna point nga hmu letin a chungnung a, game tawp thlengin a hniam zawkah a ṭang tawh lo. Game hnihnaah phei chuan a tir lamah point nga hmu zawn nghalin a chak chiang hle.

Nawr a ngai
Tun hma chuan PV Sindhu hian mahni inveng (defensive) tak chungin a khel ṭhin, tun hnaiah erawh a nawrtu (attack) zawkah a ṭang ta deuh zel. World number 7 chuan, "A tirah khan tih fuh tawk loh ka nei a, chu chu coach khan min hrilh vat.

"Rang takin ka insiam ṭha, game hnihnaah phei kha chuan a bul ka ṭan fuh em avang khan harsa a awm tawh lo tluk a ni. Ka khingpui nawr na tura min fuihna kha ka tan chuan a hlawk thlak," tiin a sawi chhuak.

Hyderabad nula hian a match hmasa zawkah pawh attacking game hmuhnawm a chhawp chhuak tawh, tuna hma lama a khelh dan phung a thlak mek a, a khingpuite tan pawh ani hmachhawn tur chuan inzir thar a ngai dawn niin a lang.

Hmabak hautak
Inkhel dangah Japan nula Akane Yamaguchi chuan Korean nula Kim Gaeun 21-17, 21-18 in a hneh. World number 5 Yamaguchi hi champion tura rinkai zinga mi a ni phak a, ani hneh hi Sindhu tan pawh a harsa dawn.

Kum 26 mi Sindhu chuan, "Olympic a nih tawh chuan engmah awlsam a awm lo. Miten ka khelh ṭhat thu min hrilh a, ka lawm hle. Chutih rualin kei chuan match khat te te chauh ka ngaihtuah," tiin thil a ngaihtuah lawk vak duh loh thu a sawi.

Sindhu hma hun hi a huphurhawm zawnga thlir tu tan chuan a khirh dawn, tualchhung nula Yamaguchi hi hneh pawh ni se semifinal-ah world number 1 Tai Tzu-ying a la hmachhawn thei dawn, gold medal match hnaih tawh mah se paltlang tur an la hraw hle.