Champion lai hnehin India an tlang

India mipa hockey team chuan nimin zing khan Olympic champion lai Argentina 3-1 in an hneh a, group match vawi li an khelh aṭanga point kua hmuin Tokyo Olympic 2020 neih laiah quarterfinal an lut.

Oi Hockey Stadium-a inkhelah India tan - defender Varun Kumar, midfielder Vivek Prasad leh defender Harman-preet Singh ten goal khat ṭheuh an khung; South American ram lamin forward Maico Casella hmangin goal khat nei ve mah se awmzia a awm phak tawh lo.

India team hian vawiin tlai dar 3:00 hian an group match hnuhnung ber atan Japan an hmachhawn dawn, a thlengtu ram hian match li an khelh tawhah point khat chiah an la neih avangin knock out stage luh beiseina an nei tawh lo.

Group A aṭangin hmahruaitu Australia leh pahnihna India an tlang chiang tawh - Spain, New Zealand leh Argentina ten hmun ruak pahnih an inchuh ang, ram pathum hian point li ṭheuh neiin khelh hmabak match khat an la nei bawk.

India coach Graham Reid chuan, "Argentina chuan an thiam dan takin an khel, an tum ang takin corner aṭangin goal an khung bawk. Mahse, keini chuan an khelh thiam dan hi kan hre bel viau a, inven dan leh beih let dan tur ṭha takin kan lo ruahman.

"A tir lamah goal khung mai lo mah ila kan dawhthei em em, ka naute khan ka duh angin an khel. Japan nen kan inkhelh leh tur hi kan ngai pawimawh dawn, quarterfinal hmabak kan nih avangin boruak ṭha neih zel a ngai," tiin chak zel an duh thu a sawi.

World number 4 India hian an match hmasa berah New Zealand (3-2) in an hneh, world number 1 Australia (7-1) lakah chesual ve zauh mah se an tlu hlen lo. Spain (3-0) an sawp hnuah Argentina (3-1) an hneh leh - Japan lakah pawh point thum an hmuh ngei a rinawm.