Arsenal an la bazar zel dawn

Nipui bazarah Arsenal chuan an mamawh an dap mek zel a, season hmasa lama loan hmanga an hawh tawh Martin Odegaard an la ngaihven chhunzawm zel - Real Madrid lamin an midfielder hi an chhuah phal dawn em tih a la chiang lo thung.

Mikel Arteta-a'n Benfica aṭangin defender Nuno Tavares leh Anderlecht midfielder Albert Sambi Lokonga te an lei fel tawh. English defender Ben White chu Brighton aṭangin an la dawn tih a chiang tawh bawk - tlarhma pui tur tur midfielder an la zawng mek.

Number 10
Mesut Ozil awm loh hnuah Arsenal hian number 10 ṭha tak an la nei leh lo, rawlthar Emile Smith Rowe chu kum 2026 thleng a contract an pawhsei sak bakah Ozil jersey number an chhawmtir bawk.

English midfielder hian season hmasa khan theihna a nei sang tih a lantir tawh, a laka rinna an nghat ngam pawh hi a mak lo - kum 20 mi hian Premier League season duhawm a hman ngei pawh a beiseiawm.

Mahse, EPL hautakzia inhrilh nawn a ngai lo - Smith Rowe chauh neih hi Gunners tan thlamuanpui ngawt a la fuh lo, a kawppui tur emaw a elpui tur emaw an la mamawh, chutiang mi chu an zawng mek.

Odegaard?
Season hmasa khan Arsenal hian loan hmangin Real Madrid player pahnih - Dani Ceballos leh Martin Odegaard te an hawh. Spanish club lian hian manager thar Carlo Ancelotti an nei a, an player hi an kokir.

Italian manager hian a chhawr duh dawn em tih erawh a la hriat chian loh a, English club lamin an la beisei danah Norway international midfielder zawk hi chu lei emaw, loan hmang bawk emawa hawh leh theih tur niin a lang.

Football transfer bika rin hlawh, Italian journalist Fabrizio Romano chuan, "Arsenal hian Martin Odegaard an la ngaihven reng, Real lamin an chhuah phal a nih chuan a ngheta lakluh pawh an inpeih," tiin a sawi, eng pawh thleng thei a la ni.

Theih loh tase
Martin Odegaard an duh a, mahse an lak theih loh chuan player dang an ngaihven a ngai dawn. Arsenal hel lai zinga langsar ber chu James Maddison a ni - Leicester City midfielder la chhuak tur erawh chuan sum an hman hnem deuh a ngai ang.

English midfielder hian Foxes tan kum 2024 thleng daih contract a nei mek, kum 24 mi chauh a la nih bawk avangin a man a tlem thei lo. English media ṭhenkhat chuan pound maktaduai 70 aia tlawm chuan lei a harsat tur thu an ziak.

Midfielder Maddison bakah Sheffield United keeper Aaron Ramsdale leh Chelsea striker Tammy Abraham te nen sawi zawm an ni mek bawk a, anni pahnih lalut tur erawh chuan an player neihsa an hralh ṭhen a ngai dawn.

Chhuak tur an awm
Jose Mourinho-a'n AS Roma lamah Granit Xhaka lakluh a tum a, indawrna pawh thui tak kalpui a ni tawh. Mahse, Swiss midfielder man zat turah inremna a la awm thei lo. Serie A club lamin Arsenal phalna zat an theh chhuah theih erawh chuan an lalut thei nghal ang.

Hector Bellerin pawh a chhuak dawn niin a lang. Spanish defender aiawh (agent) chu kar hmasa khan Milan khawpuiah a awm - Serie A champion Inter Milan nen an indawr mek, kum 2023 thleng contract nei mah se a hlutna anga dawrtu a hmuh chuan an chhuah hreh lo.

Newcastle United lamin Joe Willock lak ngheh an tum ve mek. Arsenal academy chhuak Ainsley Maitland-Niles leh Reiss Nelson te pawh chhuak tura ngaih an ni a, an neihsa an hralh dan a zirin Gunners hian sum tam zawk an la hman belh ngeiin a rinawm.