Celtic-in Champions League khel dawn lo

Scottish club Celtic-in Champions League second qualifying round-ah Danish club Midtjylland an hneh lo a, season tharah Champions League an khel dawn lo. Chutihrualin Celtic tan Europe-a inlan theihna kawng a la inhawng a, Europa League third qualifying round an khel chhunzawm ang.

Celtic Park, Glasgow-ah first leg khelh a ni a, Celtic leh Midtjylland te hi 1-1 in an inhnehtawk. Nilaini zan khan MCH Arena, Herning-ah second leg khelh a ni a, hun pangngaiah 1-1 thoin an inhnehtawk. Extra time khelh a ni a, minute 94-naah Raphael Onyedika-a'n Midtjylland chakna goal a khung.

Celtic hian an mikhualna hmunah hian Callum McGregor hmangin minute 48-naah goal an khung hmasa a, Scottish club tlarhnung chetsual vangin Danish club-in minute 61-naah Awer Mabil hmangin an sut.

First leg leh second leg-a an goal khung zat hi an inang chiah a, chutihrualin inang lo pawh ni se a belhkhawma an inhnehtawk chuan extra time khelh tho tur a ni. A chhan chu tun season aṭangin away goal rule a awm tawh lo.

Scottish club hian ball chang tam mah se extra time ṭantirhah an chesual nghal a, minute 94-naah Midtjylland substitute Onyedika-a'n extra time-a goal awmchhun a khung. Celtic hian hun rei tak Scottish football an thunun a, chutichung chuan Champions League-a inpettlin hi an harsat.

Cetlic-in tun season chhiar telin season li chhung chhung a zawnin Champions League an khel lo a, an khelh ṭumah pawh knockout stage an luh hnuhnun ber chu 2012/13 season daih tawh kha a ni.

Scottish club tan Europa League khelhna kawng a la inhawng a, August 5, Ningani zan dar 9:15-ah Czech club Jablonec nen an inkhel ang. Celtic manager Ange Postecoglou chuan, "A tawpah khan kan chau tih a lang. Ka player-ten an theihna zawng zawng an chhuah a, goal an rawn khung hma zawng kha chuan inkhel pawh khan thunun a ni," tiin a sawi.