Varane hi a ṭha tih hriat sa a ni - Solskjaer

Manchester United chuan Nilaini zan khan Premier League kai thar Brentford nen Old Trafford-ah friendly match khelin 2-2 in an inhnehtawk a, inkhelh banah manager Ole Gunnar Solskjaer chuan an player thar Raphael Varane chungchang a sawi.

Norwegian manager Solskjaer chuan, "Real Madrid nen inremna kan nei hi ka lawm hle. A ṭha tih hriat sa a ni a, kum tam tak chhung ka lo enthlak tawh a ni. Sir Alex-a'n a career tawp lam khan a la teuh hle tih ka hria. Football lama a sulhnu han thlirletsak ila, a nihna chu a chiang. Nomawi chawi theih chu a chawi vek tawh," tiin a sawi.

English club hian Varane hmain Jadan Sancho an lalut tawh bawk a, Solskjaer chuan, "Kum naupang zinga forward hmuhnawm ber zinga mi Jadon Sancho leh centre back zinga zah hlawh kai pha Varane kan lalut hian club-in tum sang tak a nei tih a lang. Tihfel tur ṭul ang te kan tihfel thuai ka beisei a, chutihrualin Brexit leh Covid-19 vangin eng chen nge a mamawh dawn tih erawh ka sawi thei lo," tiin an player thar lak thar pahnih chungchang a sawi.

Goal ropui
Manchester United-in QPR laka 4-2 a an tlawm hnuah Nilaini zan khan Old Trafford-ah Brentford an mikhual a, entu 30,000 hmaah 2-2 in an inhnehtawk.

Friendly match inkhel nung ṭha takah hian goal ropui an inkhung siak emaw tih mai tur a ni. Minute 12-na lekah Anthony Elanga-a'n Aaron Wan-Bissaka cross chu vawi khatah a volley nghal a, kawh zetin goal-ah a lut.

Minute 20-naah corner aṭanga ball per chu Brentford midfielder Shandon Baptiste-a'n box pawn aṭangin mawi zetin a volley goal. Man United-in goal ropui thoin an chhanglet a, minute 50-naah Andreas Pereira-a'n mawi tawpa mawiin a volley goal leh bawk.

Brentford lamin Bryan Mbeumo hmangin minute 78-naah siphurh an sut a, goal dang a luh belh tawh lo. Man United hian July 31 zan dar 6:30-ah Preston nen friendly match an khel leh ang.

Thutlukna harsa
Man United forward Marcus Rashford chu a dar (shoulder) na vangin a awm dan tur tihfel a ṭul. Kum 23 mi Rashford chungchangah thutlukna an siam ang a, zai a ṭul dawn a nih chuan loan-a chhuak thei player ṭhenkhat an chelh thung ang.

Solskjaer chuan, "Marcus dinhmun hi kan enfiah leh dawn. Amad hian Olympic a khel mek a, a rawn let hunah a chungchang kan ngaihtuah dun ang. Elanga hian thutlukna siam a ti harsa hle. Goal khung thei player a ni a, amah hi a nung ṭha em em a, academy player thuawih tak a ni," tiin a sawi.

Brentford nen hian Solskjaer-a'n rinrawla hman theih tura ngaih chu Aaron Wan-Bissaka chiah a chhawr a, squad chah ṭha tak a neih avangin player ṭhenkhat loan hmanga a chhuahtir a ṭul dawn. Hemi a nih avang hian friendly match hnuhnung pahniha goal khungtu Elanga bakah Amad Diallo, Teden Mengi, Andreas Pereira, Jessie Lingard leh Facundo Pellistri te hi loan hmanga chhuak thei vek an la ni.

Player inlante: Heaton; Wan-Bissaka, Tuanzebe, Mengi, Williams (Dalot 45'); Pereira (Garner 61'), Matic (Hannibal 75'); Mata (Pellistri 61'), Lingard (van de Beek 75'), Elanga (James 61'); Greenwood (Shoretire 75').

Player inlan lo : Grant, Levitt, Fish, Kovar, Hugill, Galbraith.