Tui hleuh chak Caeleb Dressel a langsar

Tokyo Olympic 2020 neih laiah Caeleb Dressel chu hming langsar tak a ni mek - gold medal pahnih a hlawh chhuak der tawh. 4x100m freestyle relay-a hlawhtlinna an chan hnuin 100m freestyle-ah gold medal a hlawh chhuak leh ta.

American star hian nimin khan 100m freestyle chu 47.02 second chhung lekin a hleuh thleng a, he infiamna huang bikah chuan Olympic record thar a siam, champion lai Kyle Chalmers chu pahnihna a ni - Australian tlangval hian 47.08 second hun a hmang thung.

Florida tlangval, thla thara kum 25 tling tur Dressel chuan, "Team inelna huangah chuan hlawhtlinna ka chang tawh, mimal erawh chuan tun hmain ka la hlawhtling ngai lo, mawhphurhna sang tak nei chungin inelna hi ka hmachhawn.

"Tunah chuan ka duh leh beisei ang ngeiin gold medal ka hlawh chhuak ta, ka tan chuan a hluin a ropui takzet. Gold medal hmasa a nih rual hian a hnuhnung ber erawh a nih loh ngei ka beisei tlat a ni," tiin a sawi.

Dressel hi a che fuh zel a nih chuan Olympian hlawh-tling berte zinga awm theihna remchang a nei dawn. Tokyo Olympic-ah hian mimal inelna pahnih - 100m butterfly leh 50m bakah; team inelna pahnih bawk - medley leh mixed medley te hmachhawn tur a la nei.

Michael Phelps khan Beijing Olympic 2008 khan gold medal pariat a la, Munich Olympic 1972 khan Mark Spitz chuan gold medal pasarih a lo la tawh bawk - anni pahnih bak hi chu Olympic vawi khata gold medal paruk la tling thei an la awm ngai lo.

Feet ruk leh inches thuma sang Dressel chuan, "Ka chungah mawhphurhna sang tak a awm, chumi chu ka ti hlawhtling thei dawn em tih min thlir ṭhup tih ka hria. Hetiang boruak hian min ti buai hran lo, kei chuan ram tan theihtawp ka chhuah chhunzawm mai dawn a ni," tiin a sawi.