Tokyo 2020 Vawiinah hmeichhe football quarterfinal

Oympic hmeichhe football quarterfinal chu vawiin hian khelh a ni dawn. Chawhnu dar 1:30-ah Canada vs Brazil, chawhnu dar 2:30-ah Great Britain vs Australia, tlai dar 3:30-ah Sweden vs Japan leh tlai dar 3:30-ah Netherlands vs United States te an inkhel ang.

Hmeichhe football semfiinal hi August 2, Thawhṭanniah khelh a ni dawn a, pathumna zawnna leh champion zawnna hi August 5 leh August 6-ah neih tur a ni.

Olympic khel pha chin
Olympic khel tur zawnna hi khawlmualpui a zirin a danglam ve zel. Inelna thlengtu Japan hi tling sa a ni a, South America chuan Olympic khel tur zawnna atan hian Copa America an hmang. An aiawhin 2018 Copa America champion Brazil an tling.

Oceania lamin 2018 OFC Nations Cup an hmang thung a, New Zealand an tling. Europe-in 2019 FIFA Women's World Cup hmangin he inelna thleng sang pathum Great Britain (England), Netherlands leh Sweden te an tel thung.

North America, Africa leh Asia aṭangin Olympic khel tur inelna hrim hrim hi an zawng. CONCACAF aṭangin Canada leh United States an tling a, Asia ram aṭangin Australia leh China an tling a, Africa aṭangin Zambia an tling bawk.

Hmunruak pakhat hi Africa leh South America aiawhten an inchuh a, Chile-in Cameroon 2-1 a hnehin an tling.

Rio 2016 kha
Olympic hnuhnung ber Brazil-a neih a nih khan Germany-in final an lut a, Sweden hnehin gold medal an la. Tokyo 2020-ah erawh champion lai Germany hi an tel pha lo a, silver medalist Sweden erawh champion rinkai zinga mi an ni.

Brazil leh Canada ten bronze medal an inchuh a, Canada hian inelna thlengtu Brazil 2-1 a hnehin medal an la. Tokyo 2020-ah pawh hian Brazil leh Canada te hi an awmna group-ah pahnihna ve ve an ni a, quarterfinal-ah an inhmachhawn nghal dawn.

Brazil pahnihna an nih chhan hi anmahni aia Netherlands-in goal an khung tam zawk vang a ni a, an point hmuh zat erawh a inang. Selecao tan Rio 2016-a player pawimawh kum 35 mi Marta leh kum 27 mi Beatriz te an la pawimawh reng.

Canada hian Chile an hneh a, Japan leh Great Britain nen an inhnehtawk. FIFA ranking-ah Canada hi pariatna an ni a, Brazil hi pasarihna an nih phak chauh avangin an intum tawk dawn tih a chiang.

Marta Vs Sinclair
Hmeichhe football legend sawi dawn chuan Brazil captain Marta leh Canada captain Christine Sinclair te sawi hmiah a thiang lo a, player pahnih an sulhnu a ropui dun hle.

Kum 35 mi Marta hian FIFA World Player of the Year an tih ṭhin, a hnu lama Best FIFA Women's Player an tih kha ṭum ruk ngawt a la thei. Brazilian forward Marta hian mimal chawimawina awm thei ang chu a la vek tawh a tih theih a, FIFA Women's World Cup-ah goal 17 khung tawhin ani aia khung tam an awm lo.

Marta hi khelmualah a chevel a hmuhnawm a, ball a thiamna hian nasa takin hmeichhe football a chawi sang. Kum 38 mi Christine Sinclair hi goal khung thei hming thang a ni thung a, ram tan goal 187 a khung.

International football-ah Sinclair hian goal a khung tam ber a, kum 2000 aṭang khan ram tan khel ṭanin tun thlengin Canada innghahna a la ni thei. Tokyo 2020-ah hian Sinclair hian Japan nen an inhnehtawk ṭumin goal a khujng nghal a, goal dang a khung zui loh avangin Brazil nen hian khung ngei a tum ang.