Sweden hmaah Japan

Sweden-in Olympic hmeichhe football group stage-ah an khingpui an hneh vek. Blagult hian vawiin tlai dar 3:30 hian Saitama-ah inelna thlengtu Japan an hmachhawn dawn.

Peter Gerhardsson-a kaihhruai Sweden hi FIFA ranking-ah pangana ni lai an ni a, Olympic-ah erawh champion rinkai zinga mi United States an hneh theih avangin medal la ngei tura ngaih an ni.

Blagult tan hian Stina Black-stenius-a'n goal thum a khung tawh a, Fridolina Rolfo-a'n goal hnih khungin Anna Anvegard leh Madelen Janogy ten goal khat ve ve an khung tawh bawk. Sweden hian goal kua khung tawhin goal hnih chiah an la chhuah.

Chutihrualin Sweden khingpui tur Japan hi inelna thlengtu an nih miau avangin dah hniam theih an ni lo. Japan hian pathumna ni chungin quarterfinal an thleng a, Chile laka goal pawimawh khungtu Mina Tanaka chu an innghahna tur a ni thei ang.