En châkawm Netherlands Vs United States

Hmeichhe football a nih tawh chuan United States hming a langsar nghal a, vawiin tlai dar 4:30 hian Yokohama-ah Netherlands nen an inkhel dawn. Olympic hmeichhe football quarterfinal-ah match tawp bera inkhel tur hi en a châkawm ber.

Netherlands hian quarterfinal lut tur hian match thum lekah goal 21 an khung a, Oranje tana goal khung tam ber chu Arsenal forward Vivianne Miedema niin goal riat a khung tawh. Kum 25 mi Miedema hian Olympic-ah hming a chher hle, match hnuhnung bera China nen an inkhelh ṭum phei chuan hun tawp lam minute 30 chauh inlanin goal hnih a khung hman tho.

Oranje hi FIFA ranking-ah palina an ni mek a, semifinal thleng thei tur khawpin an ṭha tih pawh a chiang. Mahse an khingpu tur United States hi FIFA ranking-ah pakhatna an ni a, he team-ah hian Carli Lloyd, Becky Sauerbrunn, Alex Morgan leh Megan Rapinoe te an awm miau avangin Netherlands aiin chak tura rinkai zawk an ni tho ang.