Coleman tan contract thar

Everton chuan an captain Seamus Coleman chu season khat atan contract an ziah thar pui a, an inremna ang chuan kum 2023 thleng Premier League club tan hian a khel zui dawn tihna a ni.

Ireland international Coleman hian 2009 khan Sligo Rovers aṭangin Goodison Park hi a zawm a, inelna hrang hrangah match 350 a khelhsak tawh - season hmasa kha malpui hliam vangin buai mah se league match 18-ah bul a ṭan hman tho.

Kum 32 mi Coleman chuan, "Ka tan chuan contract pawh sei hi a hluin a lawmawm hle, nitin mai hian club tan eng nge ka tih theih ang tih ka ngaihtuah ṭhin. Training naah pawh theihtawp ka chhuah ṭhin a, player dang pawhin chutiang bawkin an ti ṭhin.

"Manager thar kaihhruaina hnuaiah season duhawm hman theih kan inbeisei mek, tuna kan inbuatsaih dan thlir chuan season hmasa aia kan thlen san theih ngei pawh kan beisei," tiin a sawi.

Everton hian an manager Carlo Ancelotti chu Real Madrid lakah an chan a, an hmelma Liverpool manager hlui Rafael Benitez kaihhruaina hnuaiah an khel dawn. Season hmasa khan Premier League-ah point 59 hmuin 10-na ni chungin season an khar a, kuminah khum ngei an tum ang.

Spanish manager enkawlna hnuaia an league match hmasa ber atan August 14 hian Southampton an mikhual dawn a ni.