Lalremsiami telna India an chak Quarterfinal luh beiseina a la awm
India hmeichhe hockey team chuan nimin khan Ireland 1-0 in an hneh. Tokyo Olympic 2020 neih laiah Lalremsiami Hmar telna team hian quarterfinal luh beiseina an la nei - chak ngei ngei erawh an mamawh dawn.
Tukin dar 8:45 hian an group match hnuhnung ber atan India hian South Africa an hmachhawn dawn, inkhel dangah Ireland leh Great Britain an inhmachhawn thung ang - India tan chak ringawt a tawk dawn lo; Ireland inkhel result hi an ngaihchan tel a ngai dawn.
Great Britain hian point ruk hmuin pathumna dinhmun an luah a, quarterfinal atan an la tling chiang bik lo; point mamawh ve tho an la nih avangin chak an tum dawn, hei hi India tan chanchin ṭha a ni ang.
Group A aṭang hian Netherlands leh Germany an tling chiang tawh, pathumna Britain, Ireland leh India ten hmunruak pahnih an inchuh dawn - chak la nei lo South Africa erawh an tla tawh.
Mizo nula
Nimin Oi Hockey Stadium-a inkhelah Lalremsiami Hmar a langsar. Kolasib nula hian second quarter minute sarihnaah hun ṭha bik a nei, striking area chhungah ball luhpuiin hun remchang a insiam a, mahse a Ireland keeper bum a tum chu a paltlang thei lo.
Hockey World Cup hnuhnung bera best keeper Ayeisha McFerran chuan Remsiami lo tluk chilhin a lo dang. FIH Rising Star of the Year ni tawh hian Navneet Kaur tan pawh ball ṭha bik a pe, mahse forward Navneet hian goal atan a chantir thei mai lo a ni.
Mizo nula Remsiami'n goal nawr bakah a venhim kawngah a thawh hlawk, inelna neih laiah goal la khung chiah lo mah se India tan player rinrawl a ni phak - tukina South Africa nen an inkhelh hunah pawh hmun pawimawh a chang leh ang.
Goal khat
India lamin an match hmasa lamah goal khung an harsat a, an tlarhnung a phui lo bawk. Ireland lakah erawh tlarhnung a phui a, tlarhma lamin beisei ang goal erawh an la sual chhuak thei nghal mai chuang lo - goal a lut dawn lo niin a lang hman.
Hun tawp hma minute thum vel chauh awm tawhah captain Rani Rampal chuan striking area sir lam aṭangin na zetin goal lamah a hlap phei, ball kawh zet hi goal bula awm Navneet-i chuan lo tawk pial zeuhin goal-ah a lut a, point thum hmuh nan a tawk bawk.
World number 10 India tan an hmabak number 16 South Africa hi team huphurhawm an ni hran lo. Mahse, Ireland laka penalty corner vawi riat ngawt an chhawr ṭangkai theih loh ang kha an kalsan a ngai dawn, chak ringawt loin goal khung hnem a pawimawh ang.