Gold medal panin Sindhu a kal zel
India nula chhuanvawr, badminton khel thiam hmingthang PV Sindhu chuan Tokyo Olympic gold medal vuak chhuah ngei a tum, a hma a ding apiang chu a hneh zel - tunah chuan semifinal a lut ta. Vawiin chawhnu dar 2:30 hian world number 1 Tai Tzu-ying a hmachhawn zui dawn.
Nimin inkhel hmuh-nawm takah Sindhu hian Japan nula Akane Yamaguchi lakah 21-13, 22-20 in hnehna a chang, game hnih chauh khel mah se chak tur hian minute 56 hun a mamawh. Game khatna hi minute 23 an khel, a hnuhnung zawk erawh minute 33 a ni thung.
Quarterfinal inkhel hnuhnung zawkah seeded pakhatna Tai Tzu-ying hian a khingpui Ratchanok Intanon chu 14-21, 21-18, 21-18 in a hneh. Chinese Taipei hian chak turin vanneihna a mamawh tel a, seeded parukna Sindhu hmachhawn a chak bikin a rinawm lo.
Sindhu a ṭha tawk
Rio Olympic-ah final a lut a, mahse Carolina Marin hneh loin silver medal a dawng. World number 1 dinhmun a luah chhunzawm a, chumi hnuah world champion a ni hial - tunah pawh world champion a la ni, hri leng vangin season hmasa erawh World championhsips an khel lo.
Tournament a khelh hnuhnung hoah Sindhu hian beisei a phak lo ṭhin. Mahse, a beidawng duh chuang lo - Olympic hma hian England ramah training te a zuk nei zak zak hial - India rama inzir duhkhawp loh vang ni loin boruak dang tawn a duh vang a ni.
Group stage match hnih bakah - last 16 leh quarterfinal a khelh zawh thleng hian game hloh a la nei miah lo. World number 4 Yamaguchi lakah pawh a tir aṭangin a chungnung, game hnihnaah erawh a khingpuiin game point a hmuh tawh chu a pawt thla.
A la zo lo
Hnehna a chan hnuah Sindhu chuan, "Ka chak avangin ka lawm takzet, mahse inelna hi a la zo lo. Hmabak hautak leh hlen chhuah tur ka la nei," tiin a sawi a, gold medal chu awlsam taka lak mai theih a nih lohzia a hrechiang.
Hyderabad nula chuan sawi zawmin, "Ka hmabak hi a pawimawh, ka hmaah tu pawh rawn ding se 100% rilru ka pek a ngai," a ti. Quarterfinal a khel thlir chuan Sindhu hi a chau tih a hriat, Japan khawpui a lum avangin zan lama hahchawlhna hun ṭha neih a pawimawh dawn.
Sindhu hian Tai Tzu-ying lakah record a nei ṭha lo, an intawn hnuhnung paliah vawi thum a chak lo. Mahse, 2019 August thla khan World championships quarterfinal-ah Sindhu hi a chak zawk a, a champion zui bawk - chak turin beisei a nei ngam ang.
