Olympic aṭangin Djokovic a tla

Mipa tennis player dangte la tih ve theih ngai loh 'Golden Slam' chu Novak Djokovic tan meuh pawh tih theih a ni ta bik lo. Serbian tlangval hi Alexander Zverev hneh loin Tokyo Olympic semifinal-ah a tla.

Nimin chaawhnu lam inkhelah German tlangval Zverev hian world number 1 hi 1-6, 6-3, 6-1 a hnehin final a lut a, semifinal lehlama hnehna changtu Karen Khachanov nen goal medal an inchuh ang.

Russian player Khachanov hian a khingpui Spanish player Pablo Carreno Busta chu 6-3, 6-3 in a lo hneh ve thung, hnehna chang tur hian darkar khat leh minute 19 hun a hmang a ni.

A thlawn
Tennis season khatah Grand Slam pali - Australian Open, French Open, Wimbledon leh Wimbledon an khel ṭhin. Olympic awm kumah chuan, infiamna khawmpui liana gold medal lak bakah major tournament palia champion bawk chuan 'Golden Slam' a ni.

Kum 1988 khan German legend Steffi Graf-i chuan Golden Slam hi a lo hlen chhuak tawh, ani bak hi chu player dang hetiang ti thei hi an la awm leh lo. Mipa zinga a hmasa ber nih tum Djokovic pawh a beiseina a thamral.

Grand Slam hmasa pahthumah Djokovic hi a champion vek, Tokyo Olympic hi la thei ni se chuan OS Open chauh a hmabak tawh ang. Mahse, Olympic aṭangin a tla ta si, kum 34 mi a nih tawh avangin Olympic dang nghah leh chu beisei ngam chi a ni tawh lo ang.

A pawi
Djokovic hian season a hmang ṭha a, semifinal hma khan a zawnin match 23 a chak tluang thei. Inrintawkna sang tak nen Japan khawpui a pan, singles match chauh pawh a hautak tehlul nen mixed doubles a khel tel bawk.

Tokyo khawpui a lum em em a, chutih karah nitin match khelh a ngai - singles a khelh zawh hnuah mixed doubles lamah a inlan leh ṭhin. Nizan pawh khan mixed doubles huangah semifinal an khel zui, result erawh kan hre hman lo.

Thil thleng tawh a siamṭhat theih tawh lo. Djokovic hian Serbia tan medal tam zawk hlawh chhuah a duh tih chu a chiang, chutih rualin medal lak tam a tum luatah a zuam sual niin a lang - a taksa chaknain a tlin bik lo a ni.