Olympic boxing Lovlina Borgohain-i'n medal la dawn

Tokyo 2020-ah nimin khan Lovlina Borgohain-i'n welterweight (69kg) category-ah Chen Nien-chin split decision (4-1) in an hneh a, Indian boxer hian semifinal lutin a chhe berah bronze medal a la dawn. Lovlina-i'n hnehna a chan lai hian lightweight category-ah Simranjit Kaur chuan a match hmasa berah Sudaporn Seesondee chu unaninous decision (5-1) a hneh loin a tla.

Vawiin hian India chhuanvawr Amit Panghal a inlan bawk ang. Mipa flyweight ranking-a number 1 Amit Panghal hian first round a bye hnuin tukin zing 7:30 hian last 16-ah Colombian boxer ṭha Yuberjen Martínez a hmachhawn dawn.

Tlai lam dar 3:36-ah hmeichhe middleweight quarterfinal khelh a ni dawn a, Pooja Rani leh Li Qian te an inhmachhawn ang. Haryana boxer Pooja Rani hian hnehna a chang a nih chuan medal a la thei dawn. Olympic boxing-ah hian pathumna inchuh a ni lo a, semifinal-a chak lo zawk pahnih zelin bronze medal an dawng.

Pathianni zing dar 9:36-ah Satish Kumar hi super heavyweight quarterfinal-ah Uzbekistan boxer Bakhodir Jalolov nen an intawn dawng. Rio 2016-ah India-in boxing-ah medal an la lo a, Tokyo 2020-ah erawh medal pakhat la chiang tawhin medal dang lak belh thei dinhmunah an ding.

India hian tun ṭum Olympic-ah hian mipa boxer panga leh hmeichhe boxer pali an tir a, pahnih ve ve an la dam. Tokyo 2020-a Indian boxer zinga la thleng sang ber Lovlina Borgohain hian August 4, Nilaini chawhma dar 11:00-ah Busenaz Surmeneli nen welterweight semifinal-ah an inhmachhawn ang.