Olympic medal la thei ram te ber San Marino

Tokyo Olympic neih laiah San Marino nula Alessandra Perilli chuan hmeichhe silai inkah siak peng pakhat Women's Trap-ah silver medal a kap chhuak, an ram tana Olympic medal hlawh chhuak thei hmasa ber a ni.

Italy ram bula awm, tlang mawi tak tak kara ram tereuhte hi a zau zawng chu 61.2 sq km chauh a ni a, mipui pawh 34,000 vel bawr chauh an cheng - Mizoram khaw lian pangngai ṭhenkhat nen an ram pumpui hi a intiat tawk vel chauh!

Kum 33 mi Perilli chuan, "Medal hlawh chhuah tumin kan thawkrim a, theihtawp kan chhuahna chu a rah chhuah kan hmu ta," tiin bronze medal a dawn hnuah mittui tla chungin a sawi, kum 1960 aṭanga Olympic khel ve tawh ram tan chuan a medal hi a hlutna a sang dawn.

Olympic medal chungchang sawi zawmin Perilli chuan, "Kei leh kan ram tana Olympic medal hmasa ber a ni a, kan chhuang hle. Kan ram hi te hle mah se ram dang lakah kan zahpui ngai lo a, kan chhuang hle zawk a ni," a ti.

Perilli hi Italian khawpui Rimini a piang a ni, mahse kum 18 mi a nihin San Marino khua leh tui nihna a nei. London Olympic 2021 khan an ram tan a inlan tawh a, palina a ni; hei pawh hi an ramin an tih ṭhat ber ṭum a ni a, tunah chuan a record ngei a khum leh ta.

Tokyo Olympic Women's Trap-ah hian Slovakia nula Zuzana Rehak-Stefecekova chuan gold medal a dawng a, silver medal dawngtu chu United States aiawhtu Kayle Browning a ni thung.