Inelna hmachhawn turin ka inpeih - Verstappen

Max Verstappen chuan Formula 1 inelna hmachhawn turin a inpeih thu a sawi a, a elpui Lewis Hamilton hneh let nghal a tum hle. Pathianni zan dar 6:30 hian Hungarian Grand Prix an tlan ang.

F1 inelna hnuhnung ber British Grand Prix-ah thawnthu duhawm lo kan hmu. A hmasa ber atanga tlan Verstappen hi chak tura rinkai a ni, mahse a hnunga tlan Hamilton-a'n a tai palh a, a car chhiain a tlan zui thei ta lo.

Red Bull driver a tlan zui theih loh lai hian, amah ti palhtu Mercedes driver Hamilton erawhin hnehna a chang - driver pahnih hi championship lama inel lai an nih avangin an boruak hian sawi hlawh hle.

Dutch driver Verstappen chuan, "Ka taksa dinhmun a ṭha. Ka chetsual tirh khan damdawi inah hruai ka ngai hial, a hnu lamah erawh harsatna ka nei chhunzawm lem lo, tunah hian intlansiak turin ka inpeih.

Media lamin engtiangin nge Lewis nen kan inkar an ziah tih hi ka ngai pawimawh ber lo. Kei chuan inelna hi a ṭha thei ang bera hlen chhuah hi ka duh ber a ni a, chumi tur chuan ka rilru zawng zawng ka hmang mai ṭhin," a ti.

Car intlansiakna sang ber season kal laiah inelna vawi 10 an nei tawh, point 185 hmutu Verstappen hian hma a la hruai. Pahnihna Hamilton-a'n point 177 a hmu thung, season chanve pawh an la hman tlin loh avangin hmabak a la tam.

Britain tlangval Hamilton hian F1 champion hnem ber Michael Schumacher (7 titles) a nih rual tawh, record thar siam a tumna kawngah Verstappen hi elpui hautak leh dang theitu tur a ni mek - intlansiak hmuhnawm kan en zel dawn.