Virgil van Dijk a inkhel thei leh ta

Liverpool defender Virgil van Dijk leh Joe Gomez te chu an hliam a dam tawh a, an inkhel thei ve leh ta - Reds ṭantute tan Premier League ṭan hmaa an player pawimawh pahnih dam hman hi chanchin lawmawm bik a ni ang.

Ningani zan khan Liverpool hian season thar inbuatsaih nan Hertha Berlin an hmachhawn a, hun tawp dawn minute 20 la awmah an defender pawimawh pahnih hi khelmualah an rawn tlat lut.

Austria-a inkhelah Reds hi 4-3 in an chak lo, chak lo mah se English club tan an player hliam dam hi lawmna tawk a tling. Dutch defender hi nikum October thlaa Everton nen Merseyside Derby an khelh ṭuma hliam kha a ni - a chawl rei vang vang hle.

England international Gomez pawh nikum November thlaa ram tana training an neih laia hliam kha a ni, a khup hliam zai niin season hmasa kha a tir lam bak a hmang thei lo - tunah chuan season thar ṭan turin a inpeih dawn.

Kum 30 mi Van Dijk chuan, "Ni 285 liam ta khan ka dam hun nghakin ni ka chhiar ṭan, tuna ka inkhel ve leh thei ta hi ka lawm hle. Ka inkhelh leh theih tak vanga ka lawmna hi thua sawifiah thiam theih pawh a ni lo.

"Hun harsa ka tawh lai khan bang loa min thlawp tlattu an awm a, an chungah ka lawm takzet," tiin a sawi. Dutch defender leh Gomez hi an inkhel tluang leh thei a nih chuan Jurgen Klopp te pawh thawk huaina tham a ni ang.

Liverpool hian season thara an league match hmasa ber atan August 14 zanah kai thar Norwich City an lenchilh ang. Norwich hi Championship champion thei an nih avangin fimkhur taka khelh nghal a ngai dawn.

Player Inlan First-half team: Kelleher; Alexander-Arnold, Konate, Matip, Tsimikas; Milner, Keita, Elliott; Mane, Salah, Minamino

Second-half team: Adrian, Alexander-Arnold, Phillips, Williams, Robertson, Milner, Keita, Oxlade-Chamberlain, Jones, Salah, Mane