Juventus team an khung hrang Training erawh an chhunzawm

Italian club lian Juventus chu an player zingah Covid-19 kai a awm avangin khung hran lailawk an ni a, player dang zingah erawh hripui kai an awm lo niin an tarlang - season thara atan inbuatsaihna pawh a kal chhunzawm zel.

Tunisian midfielder Hamza Rafia chuan hri leng a kai a, a hranpa a enkawl nghal a ni. Training a neihpui bakah a khelhpui leh club staff-te pawh an dinhmun enfiah nghal a ni a, chanchin duhawm lo lam erawh an neih belh rih lo.

Old Lady chuan thuchhuah siamin, "Damdawi lam thiam leh tualchhung thuneitute nen inbe rawnin, team pumpui chu midang tlawh pawh rih lo tura tih kan ni. Endik nih hnuah hri kai lote erawhin training an chhunzawm thei ang.

"Mahse, tun dinhmunah hri kai lo mah se club pawn lam mi nena inkal pawh erawh a rem dawn rih lo," an ti. Hri kai Rafia hi 2019 nipui lai khan Lyon aṭanga an lakluh a ni a, senior team tan match khat chauh a la khel.

Juve hmabak
Juventus hian a zawnin season kua zet Serie A nomawi an chawi thei a, mahse hun rei tak ro an rel tawhna chu season hmasa khan Inter Milan lakah an chan a, season an hman chhiat em avangin league match hnuhnungah palina ni turin an tling hram.

Manager Andrea Pirlo an ban a, tun hma lama an rawih tawh Massimiliano Allegri bawk an ko kir leh. Italian manager kaihhruaina hnuaiah hian a thawh hnih nan Champions League chawi an tum dawn, a thawh khatnaah chuan an hlawhtling thei lo a nih kha.

Allegri tan UCL chauh a ni dawn lo, league title laklet tum a ngai tel dawn. An elpui Inter Milan an la ṭha sa - AC Milan an indin thar mek bawk a, manager huaisen Jose Mourinho neitu AS Roma pawh an tana hnawk phak tur zinga mi an ni ang.

Allegri a zam lo
Massimiliano Allegri chuan a vawi hnih nana Juventus a enkawl thei chu a phur a, chona thar a hmachhawn chu nuam a tih thu a sawi - nizan khan season thar inbuatsaih nan Monza an hmachawn; August 8 hian Barcelona khel turin Nou Camp an tlawh dawn bawk.

Kum 53 mi Allegri chuan, "Thil reng reng hi ka tan chuan a vawi khatna ang vek a ni leh tawh a, a phurawm em em vek a ni. Ka hun hmasa lamah khan player langsar leh hrawl pui pui ka enkawl, tunah chuan ṭhangthar an tam ta.

"Training kan neih tawh chinah ka nauten min ti lawm hle, player naupang lakah beisei ka nei sang a, anni ho khawm tur hian senior player kan la nei ṭha tawk viau bawk. Kan inbuk tawk hle turah ka ngai," tiin a sawi.

Ronaldo awmna
Turin club hian Champions League chawi an duh avangin Cristiano Ronaldo an lalut. Real Madrid leh Manchester United tana UCL chawi tawh hian Juve erawh season thum chhungin a la hlawhtlin pui thei lo, kuminah tha tharin an bei leh dawn.

Euro a khelh avangin Ronaldo hian team training a zawm tlai. Paris Saint-Germain nen sawizawm ni hman mah se tun kar khan Old Lady training a zawm leh tawh a, season thar chu a tir aṭangin a inlan thei dawn tihna a ni.

Allegri chuan, "Player zawng zawng a mal malin ka be vek. Cristiano nen pawh kan inbia, kan team tana a pawimawhna leh a mawhphurhna sanzia ka hrilh. Season kan hman turah hian thil ropui min tihsak ka ring tlat a ni," a ti.

Player dang
Juventus hian Paulo Dybala, Federico Chiesa, Adrien Rabiot leh Weston McKennie te an la nei, an rawlthar rual hian theihna sang tak an nei a, an lakah Allegri pawhin beisei a nei sang hlawm hle.

Italian manager chuan, "Dybala hi kum naupang te ni chungin kan hnena rawn kal khan a ni a, tunah chuan a lo puitling ta. Player danglam bik a nih avangin a lakah pawh beisei ka nei sang. McKennie hian goal a khung theihzia inhrilh nawn a ngai lo.

"Rabiot leh Chiesa te hian theihna an nei sang a, hei aia sang leh zual hi an la thleng thei tih pawh ka hria. An theihna sang ber sawr chhuah kan tum dawn a ni, kan team-ah hian goal khung thei player kan ngah hi a vanneih tlak hle," a ti.