Hmeichhe 100m Tu nge tlan chak ber dawn?

Olympic hmeichhe 100m semifinal chu vawiin tlai hian an tla dawn a, athletics lam tui tan chuan en châkawm a ni ang. Semifinal-ah hian sprinter 24 an awm a, heat thumah ṭhen hran an ni a, heta ṭang hian pariatin final an lut ang.

Heat khat aṭangin athletes pahnih zel an tling dawn a, mi paruk baka tlan chak pahnihin final an lut bawk dawn. Round 1-a tlan chak ber chu Jamaican sprinter Elaine Thompson Herah a ni a, 10.82 lekah a thleng a, Jamaican sprinter tho Shelly-Ann Fraser-Pryce-i'n 10.84 second lekah a thleng thei bawk.

Chutihrualin World record leh Olympic record erawh a la hlat deuh. American sprinter Florence Griffith Joyner chuan 16 July 1988 khan Indianapolis, United States-ah 10.49 seconds-a thlengin World record a siam a, Seoul 1988-ah khan 10.62 seconds a thlengin Olympic record a siam.

Rio 2016 khan kum 29 mi Thompson hian 10.70 second -ah thlengin gold medal a la tawh a, tun ṭumah hian Shelly-Ann Fraser-Pryce lakah a medal hi a humhim a ṭul dawn a ni.