Carvajal tan contract thar

Real Madrid right back Dani Carvajal chuan contract thar a ziak, a khelh mekna Spanish club lian tan hian kum 2025 thleng a khel chhunzawm zel dawn tihna a ni.

Kum 29 mi Carvajal hi season hmasa khan hliam vangin a buai. Inelna hrang hrangah match 15 chiah a khel, a club hi La Liga lamah pahnihna an ni a, champion Atletico Madrid an tluk lo.

League bakah Real hian Champions League lamah pawh beisei an phak lo, semifinal-ah Chelsea hneh loin an zinkawng a tawp bawk - season tharah chona thar hmachhawnin hlawhtlin an tum ang.

Spain international bakah hian tun hnaiah midfielder Luka Modric leh winger Lucas Vazquez ten Real tan contract thar an ziak. Season thar an match hmasa ber atan August 14 hian Alaves an lenchilh dawn a ni.

Real Madrid tan player pathum contract thar ziahpui hi thu lawmawm a ni. Bayern Munich aṭangin David Alaba an lalut fel tawh bawk, mahse Austria international defender hiam coronavirus a kai tih an hmu chhuak.

Alaba hma hian striker Karim Benzema chuan hri leng hi a lo kai tawh bawk, coach thar Carlo Ancelotti tan season thar inbuatsaihna chu duhthusamin a kalpui thei rih dawn lo tihna a ni.