Olympic mipa football: Spain hmaa ding tur Ivory Coast

Olympic mipa football quarterfinal chu vawiin aṭangin khelh ṭan a ni dawn a, tlai dar 1:30-ah en châkawm ber tura ngaih Spain leh Ivory Coast te Miyagi Stadium, Rifu-ah an inkhel dawn. La Roja hian hnehna an chang a nih chuan Japan leh New Zealand inkhela chak zawn nen semifinal-ah an inhmachhawn ang.

Gold medal duh
Spain hian Olympic football-a an tel hmasak berah gold medal an la nghal a, an champion ṭum hi an rama inelna nghah a nih ṭum Barcelona 1992 kha a ni. La Roja hian kum 1996 khan quarterfinal an thleng a, kum 2000 khan final-ah Cameroon hneh loin silver medal-ah an lungawi a ṭul.

Olympic inelnaah Spain hi ṭum hnih ngawt a zawnin an tel pha lo a, kum 2012 khan tel leh mah se group stage an pel lo. Rio 2016-ah La Roja an tel lo a, tun ṭumah erawh champion ngei tumin player pawh an thlang.

Euro 2020 khelh zawhah Olympic hi khelh a ni a, Europe khawmualpui inelnaah Spain hian semifnal lutin an khel ṭha hle. Olympic-ah Euro 2020 a khel player paruk an thlang a, chungte chu Pedri, Eric Garcia, Pau Torres, Mikel Oyarzabal, Unai Simon leh Dani Olmo te an ni.

Player dangte pawh hi an hraw hlawm hle. Real Madrid midfielder Marco Asensio, Tottenham Hotspur player thar Bryan Gil, season liam taa Arsenal-a loan hmanga khel Dani Ceballos te an ni nawk. Spanish manager Luis de la Fuente a player thlan dan en hian La Roja hian champion an duh tih a chiang a, gold medal la turin pawhin an ṭha tawk.

Quarterfinal chu
Olympic ṭan hmain Spain ṭhatzia an sawi nasa a, inelna ṭan hnuah erawh beisei an phak lohzia an sawi thung. La Roja hian an match hmasa berah Egypt nen goal awm loin an inhnehtawk a, Australia 1-0 a an hneh hram hnuah Argentina nen 1-1 in an inhnehtawk.

Spain theihna thlirin awlsam zawka group stage paltlang tur an ni a, goal tam zawk khung thei tura ngaih ni mah se an ti thei tlat lo. Luis de la Fuente hote hi Ivory Coast an hmachhawn hunah chak tura rinzawk ni mah se vanduai thei an ni. Elephants hi Germany pet chhuak thei an ni a, Europe club liana khel player an kawl bawk.

Pedri chuan, "Ivory Coast kan hmachhawn hunah kan theihna zawng zawng nen kan khel dawn. Olympic-a champion ngei hi ka duh a ni," tiin a sawi a, Barcelona star hi Euro 2020 leh Olympic-ah player chhawr rim ber zinga mi a ni.

Ivory Coast lamin Manchester United defender Eric Bailly hoin goal venhim hna an thawk dawn a, counter attack hmanga nawr turin Max Gradel a awm. Kum 33 mi Gradel hi Leicester City, Leeds United leh Bournemouth te tan pawha khel tawh a ni a, Olympic-ah la che ṭha hle.

Man United rawlthar Amad Diallo erawh Germany nen an inkhelh ṭumin bench-ah a awm thung a, Spain nena khelhna hun pek a nih chuan a hming chher nan a hun bawhpelh loh a ṭul ang. Ivory Coast hian Franck Kessie an kawl a, kum 24 mi AC Milan star hi Europe club lian ho enthlak mek a ni.