Canada, Australia, Sweden leh US ten semifinal an lut

Olympic hmeichhe football quarterfinal chu nimin khan khelh a ni a, Canada, Australia, Sweden leh United States ten semifinal an lut. Brazil, Great Britain, Japan leh Netherlands te medal beiseina a tawp thung.

Brazil a tla
Miyagi Stadium, Rifu-ah Canada leh Brazil te an inkhel a, minute 120 chhungin goal a lut lo. Penalty hmangin chak zawk zawn a ṭul a, Canada tana pet hmasa bertu Christine Sinclair-i'n a hlah laiin Brazil captain Marta-i'n a pet goal thung.

Amaherawhchu Canada tana petu dang Jessie Fleming, Ashley Lawrence, Adriana Leon leh Vanessa Gilles ten an khung vek. Brazil tan Debinha leh Erika ten khung chhunzawm mah se Andressa leh Rafaelle ten an hlah a, penalty shootout-ah Canada 4-3 in an vannei.

White-i hattrick a tawk lo
Great Britain tan Ellen White-i'n hattrick siam mah se Australia an hneh zo lo. Kashima Stadium-ah Great Britain leh Australia hi hun pangngaiah 2-2 in an hnehtawk a, Matildas (Australia sawina) hi captain Sam Kerr-i'n chhanin minute 86-naah siphurh sutna goal a khung.

Extra time-ah Sam Kerr leh Kerr ten an khung belh a, White-i'n hattrick siamna goal khung belh mah se Great Britain-in an siphurh an sut theih loh avangin Australia 4-3 in an chak.

Sweden an ṭha
Group stage-a chak vek thei Sweden-in inelna thlengtu Japan lakah team ṭha zawk an ni tih an pholang a, 3-1 in an chak.

Sweden tan Magdalena Eriksson-i goal khung chu Japan tan Mina Tanaka-i'n sutsak mah se Blagult tan Stina Blackstenius leh Kosovare Asllani ten an khung belh.

US an vannei
Yokohama-ah Netherlands leh United States an inkhel a, 2019 World Cup final rematch hi a hmuhnawm hle. Hun pangngaiah Vivianne Miedema-a'n goal hnih a khung a, US tan Sam Mewis leh Lynn Williams ten goal khat ve ve an khung.

Netherlands forward Lieke Martens chuan 2-2 a nih laiin penalty a hlah. Extra time-ah US tan Christen Press leh Alex Morgan ten khung mah se offside vangin pawm a ni lo. Penalty shootout hmangin chak zawk a ni a, Oranje goal khung khawl Miedema-i'n a khung lo nghal, US keeper Alyssa Naeher-i'n vawi hnih save-in an aiawh pen chhuak player paliin an pet goal vek a, 4-2 in an vannei.