Covid-19 vangin Man United an buai

Zanin dar 6:30 hian Manchester United leh Preston North End ten Deepdale-ah friendly match nei turin ruahmanna an siam a, Covid-19 vangin an ṭhulh.

Ole Gunnar Solskjaer hote hian Nilaini zan khan friendly match-ah Brentford hmachhawnin 2-2 in an inhnehtawk. Covid-19 test neih chhunzawm a ni a, Man United team chhungah Covid-19 positive an awm.

Man United chuan, "Brentford nen inkhelh zawha Covid-19 test-ah positive rinhlelh mi tlemte an awm. Covid-19 rinhlelh te hi test nawn leh tura khung hran an ni a, fimkhur vangin Preston North End nena kan inkhelh tur pawh thulh a ni," tiin thuchhuah an siam.

English club hian Covid-19 in a tih buaite hi tute nge an nih an puang lo a, chutihrualin an thuchhuahah hian fan-te hnena ngaihdam dilna an ziah tel bakah ticket lei tawh zawng zawng pawisa an pek let (refund) leh vek tur thu an puang.

Manchester United hian August 7, Inrinni tlai dar 5:15-ah Everton nena friendly match an neih tur erawh kaltlang pui theih an la inbeisei. English club hian Premier League match hmasa berah Leeds United an hmachhawn dawn a, league match hmasa ber hi August 14 tlai dar 5:00 hian Old Trafford-ah khelh a ni ang.