Olympic Mipa Football Brazil leh Spain an la chak zel

Olympic mipa football quarterfinal chu Inrinni khan khelh a ni a, champion lai Brazil-in Egypt 1-0 in an hneh a, champion rinkai Spain-in extra time-ah Ivory Coast 5-2 in an hneh hram bawk.

Mipa football semifinal hi August 3, Thawhlehniah khelh tur a ni a, chawhnu dar 1:30-ah Brazil-in South Korea hnehtu Mexico an hmachhawn ang. Tlai dar 4:30-ah La Roja leh Japan ten semifinal hnuhnung zawk an khel ang. Inelna thlengtu Samurai Blue hian penalty shootout hmangin New Zealand an hneh.

Spain tan Mir
Miyagi Stadium, Rifu-ah inkhel hmuhnawm bik chhawpchhuah a ni a, Spain an vannei. Ivory Coast-in Man-chester United defender Eric Bailly hmangin minute 10-na lekah hma an hruai a, Spain-in minute 30-naah an sut a, Ivorian defender tihsual zarah Dani Olmo-a'n a khung.

La Roja tan Unai Simon a ṭangkai a, inkhel a nung hle. Elephants tan Max Gradel-a'n hun pek belhah a pet goal a, commentator chuan, "Inkhelh ṭan hmaa champion tura rinkai an tla dawn," tiin a sawi. Mahse thilmak a thleng a, Spain tan Rafa Mir a rawn lang. Ivory Coast tlarhnung an chesual nawn a, Wolverhampton Wanderers forward Rafa Mir-a'n injury time minute thumnaah a sut.

Extra time-ah team ṭha zawk Spain an chungnung zui a, Eric Bailly handball vanga an penalty hmuh chu Mikel Oyarzabal-a'n minute 98-naah a khung. Hun tawp hnaihah kum 24 mi Mir-a'n goal hnih dang khung belhin hattrick a siam a, Spain 5-2 in an chak. Goal luh dan en chuan La Roja an chak chiang a, inkhel en te erawhin an vanneihzia an hria ang.

Inkhel dang
Kashima Stadium-ah Japan-in hun pangngaiah goal khung thei lo mah se vanneihna an keng tel a, penalty shootout hmangin Mexico an hneh. Samurai tana penalty petuten an pet goal vek a, New Zealand tan an thiampuipa Chris Wood-a'n khung nghal mah se Liberato Cacace leh Clayton Lewis ten an pet goal a, Japan 4-2 in an chak.

Saitama-ah Brazil-in Egypt an hmachhawn a, goal khat chauh an khung. Chutihrualin Selecao hian goal an chhuah lo a, an phu ang ngeiin semifinal an lut. Goal awmchhun khungtu hi Matheus Cunha a ni a, Hertha Berlin forward hian Olympic-a a khelh ṭhat avang hian club lian zawkte ngaih a hlawh ngei ang.

Yokohama-ah Mexico leh South Korea an inkhel a, goal kua ngawt a lut. El Tri hian 6-3 in hnehna an chang. Mexico hian player an nei ṭha tih an pholang a, Olympic semifinal an luh bakah hian United States-a neih mek Gold Cup-ah final an lut bawk. Nomawi inchuhna hi tukin zing dar 6:00-ah an khel ang.

Gold Cup leh Olympic hi ngaih pawlh loh tur a ni a, Mexico hian team hran ve ve an tir. Olympic hi kum bithliah inelna a naih laiin Gold Cup erawh senior team inelna a ni a; North America, Central America leh Caribbean ramte tan chuan football inelna sang ber a ni a, European Championship leh Copa America te nen inang khat a ni.