India chhuanvawr Amit Panghal a tla nghal

Olympic boxing-ah India-in an beisei an pha lo. Flyweight (52kg) category-a ranking number 1 Amit Panghal chu Inrinni zing khan a vawi khat nan a inlan a, Yuberjen Martínez hneh loin a tla nghal. Nimin khan Satish Kumar chuan unanimous decision-in Bakhodir Jalolov a hneh lo a, Indian mipa boxer-te medal la loin an tla kim.

Hmeichhe lamah Inrinni khan Pooja Rani chuan unanimous decision thoin Li Qian a hneh lo a, Lovlina Borgohain chiah a dam tawh. Indian boxer Lovlina hian August 4, Nilaini chawhma dar 11:00-ah Busenaz Surmeneli a hmachhawn ang a, a chak lo a nih pawhin bronze medal-ah a lungawi a ṭul ang.

Panghal a tla
Flyweight category-ah Amit Panghal chu gold medal la tura rinkai a ni a, first round-ah a bye bawk. Inrinni khan Rio 2016-a silver medalist Colombian boxer Yuberjen Martinez Rivas a hmachhawn a, Indian boxer hi chak tura rin zawk a ni.

First round-ah Amit Panghal a che ṭha a, beisei ang vekin thil a thleng. Judge panga zinga paliin Amit hi chak zawkah an puang. Mahse round khatna zawh hnuah Amit Panghal-a'n a theihna a lanchhuahtir tawh lo a, ring chhunga che vel a muang a, Yuberjen Martinez a chungnung hle.

Martinez hian round hnihnaah 4-1 in an rawn hneh let a, round thumnaah chungnung leh zualin judge zawng zawngin chak zawkah an puang. Amit Panghal hi 1-4 (29-28, 27-29, 27-30, 28-29, 28-29) in a chak lo a, judge thutluknaah lungawi lohna tur a awm lo.

An tla zel
Inrinni tlaiah Pooja Rani-i'n middleweight (75kg) ah Li Qian a hmachhawn dawn. Kum 30 mi Pooja hian kawng tinrengin Li Qian hi a tluk lo a, unanimous decision-in a chak lo. Chinese boxer hi Rio 2016 bronze medalist a nih bakah world champion ni tawh a ni a, record-ah pawh a chungnung hle.

Nimin chawhma khan Satish Kumar-a'n Uzbekistan boxer Bakhodir Jalolov a hmchhawn a, Super heavyweight top seed Jalolov a chungnung hle. Jalov hian Satish hi unanimous decision-in an hneh a, Indian mipa boxer an tla kim.

Indian mipa boxer Amit leh Satish te tlak hma hian Ashish Kumar (Middleweight), Manish Kaushik (Lightweight) leh Vikas Krishan (Welterweight) te an tla tawh a; Hmeichhe lamah boxer pathum Mary Kom (Flyweight), Simranjit Kaur (Lightweight) leh Pooja Rani (Middle weight) te an tla tawh a ni.