Vawiinah hmeichhe football semifinal US vs Canada; Australia vs Sweden

Olympic hmeichhe football semifinal chu vawiin hian khelh a ni dawn. Chawhnu dar 1:30-ah United States leh Canada an inkhel ang a, tlai dar 4:30-ah Australia leh Sweden an inkhel leh ang. Final hi August 6, Zirtawpni zinga khelh tur a ni a, pathumna zawn hi August 5, Ningani chawhnuah khelh a ni thung dawn.

Olympic hmeichhe football hi 1996 Atlanta aṭanga ṭan kha a ni a, United States an champion hmasa ber. US hian record ṭha tak an nei a, vawi ruk inelna neih tawhah vawi li champion-in Norway leh Germany chiah an tlazep.

Tokyo 2020-ah pawh United States hian semifinal an thleng a, World champion lai an nih bawk avangin Canada lakah rinkai zawk an ni ang. Chutihrualin Olympic hnuhnung pahniha pathumna ni ve ve thei Canada hi dahhniam theih an ni lo a, an captain Christine Sinclair chu tun hma ang thoin an hmachhuan tur a ni.

Sweden-in group stage-ah United States an hneh a, anni hi Rio 2016-ah pawh silver medalist an ni. Blagult hi Australia lakah pawh chak tur zawka rin an ni a, chutihrualin Matildas hian semifinal lut turin champion rinkai zinga mi Great Britain an hneh. Australia captain Sam Kerr-i'n mamawh hunah goal a khung thei a, Sweden tan hna a awlsam bik lo ang.