Rashford-a dar an zai dawn

Manchester United striker Marcus Rashford-a dar hliam chu karlehah zai a ni dawn a, England international chuan, "Ka taksain a tlin chin hriat ve a ngai a ni," tiin a hliam chu inkhelhpui zel chi a nih loh thu a sawi.

Kum 23 mi forward hi a dar hliam vangin hun rei tak chu a buai tawh a, a tawpah chuan zai mai turin thutlukna siam a ṭul - October vel thleng chu a hmel kan hmu lo mai thei.

Rashford chuan, "Mi zawng zawngin ngaihdan chu an nei thiang a, mahse, kei tluka ka taksa hrechiang an awm lo. Season liam taah ka inzai lawk loh avanga mahni hmasial ang hiala sawina ka tawk a, mahse, hei hi mahni indahpawimawh vang lam a ni lo a, tun dinhmun hi ka thlen a ngaih phah hial ta zawk a ni," a ti a, Euro-ah khan hmun pawimawh a chang dawn lo tih inhre sa se chuan a kal kher lo mai theih thu a sawi bawk.

Euro-a minute 84 bak inkhel lo striker chuan sawi zawmin, "Rei tak football khel tur chuan ka taksa dinhmun ka hriatchian a ngai. Season hmasa kha goal 36 thawk chhuak chungin ka mangṭha a, a pawimawh ber erawh zirlai ropui tak nena ka mangṭha hi a ni," a ti a, a taksa chuan enkawl a mamawh thu a sawi.

Rashford hian season hman zawh takah khan Red Devils tan inelna hrang hrangah match 57 khelin goal 21-a khung a, assist vawi 15 a nei bawk.

Manchester United chuan thuchhuah siamin, "Marcus, manager Ole Gunnar Solskjaer, club medical staff leh specialists te an inrawn hnuin a dar hliam chu zai mai chu ṭha tih tlan a ni a, tunah chuan a rang thei ang bera a lo kir leh theih nan inbuatsaihna a nei ṭan nghal ang," an ti.