Olympic hmeichhe 100m tlan chak ber Elaine Thompson-Herah

Jaimacan sprinter Elaine Thompson-Herah chuan Inrinni khan 100m hmeichhe inelnaah Olympic record a siam a, 100m hi 10.61 seconds lekah a tlan thleng. Pahnihna leh pathumna hi Jaimacan sprinter Shelly-Ann Fraser-Pryce leh Shericka Jackson te an ni.

Hmeichhe 100m tlan ṭan hma hian Jamaica-in medal an la lo a, second 11 chhung lekah medal pathum an la. Beijing 2008 khan Jamaica hian hmeichhe 100m-ah medal pathum an lo hui vek tawh bawk.

Kum 29 mi Thompson-Herah hi khawvela hmeichhe tlanchak ber dawttu a ni a, a tluk loh awmchhun chu US sprinter Florence Griffith-Joyner chauh niin kum 1988 khan 10.49 secs-ah a thleng. Tun ṭuma Jaimacan sprinter-in a phak lohna hi 0.12secs chauh a ni a, second khat hmun sawma ṭhena hmun khat vel chauh a ni.

Thompson-Herah chuan, "Ka hnungzâng na vangin harsatna ka tawk a, sawiselna ṭhahnem tak ka tawng bawk. Amaherawhchu ka chungchang a ṭha lo zawnga an sawina hi infuih nan ka hmang," tiin a sawi a, Rio 2016 khan 100m leh 200m-ah gold medal a lo dawng tawh bawk. Tukin zing aṭangin hmeichhe 200m hi an tlan ṭan leh ang.

Qualifying round-ah pahnihna ni ta Shelly-Ann Fraser-Pryce-i'n 10.73 secs-ah a thleng a, a tlan ṭha ber. Final-ah erawh Thompson-Herah-i'n Olympic record a siam a, a tlan ṭhat em avangin 2008 Beijing leh 2012 London gold medalist Fraser-Pryce tan pawh chelh rual a ni lo.