Olympic champion Bencic

Belinda Bencic chu Tokyo Olympic 2020 hmeichhe tennis champion a ni. Switzerland star hian Inrinni a gold medal match-ah a khingpui Czech Republic nula Marketa Vondrousova chu set thum an khelh hnuin a hneh.

Japan khawpui boruak lum tak hnuaia inkhelah Bencic hian 7-5, 2-6, 6-3 in hnehna a chang, match point a hmuh hmasa chhawr ṭangkai lo mah se a vawi hnihnaah erawh a tlang - hnehna chang tur hian darkar hnih leh a chanve hun a mamawh.

Swiss player zingah, mipa player Marc Rosset chuan 1992 Barcelona Olympoic-ah khan gold medal a lo la tawh, ani hnuah chuan Bencic hi singles huanga goal la leh thei hmasa a ni - Roger Federer leh Stan Wawrinka te meuh pawhin an thei lo.

Grand Slam vawi 20 champion Federer leh Wawrinka te hian singles title la lo mah se, doubles huangah erawh an pahniha ṭangdun hian Beijing 2008-ah khan ram tan gold medal chu an lo hlawh chhuak tawh a ni.

Seeded pakuana Bencic chuan, "Tennis ka khelh hun chhungin nomawi dang chawi belh tawh lo pawh ni ila ka lawm tho ang, ka duhthusam leh suangtauhna chu a a takin a lo thleng dik ta, ka lawmna hi tumahin min chhuhsak thei lo ang.

"Ka khingpui khan a khel ṭha em em a, a nihna takah chuan a tu zawk zawk pawh kha chak ni ila a mak hran lo ang. Set hnuhnung berah ka vannei mai chauh a ni, mimal hlawhtlinna a hlut rualin ram tan a nih chuan a lawmawm dan a zual," tiin a sawi.

Semifinal-a tla pahnih ten bronze medal an inchuh ve thung a, pathumna zawnna inkhelah Ukraine nula Elina Svitolina chuan Kazakhstan player Elena Rybakina chu 1-6, 7-6

(7-5), 6-4 in a hneh.

World number 6 Svitolina hi Ukraine tennis player zinga medal la hmasa ber a ni. Medal hlawh chhuak tur hian darkar hnih leh minute 28 a hmang a, a khelh danah a chau tih lang mah se medal a hlawh chhuah avangin a lungawi tih a hriat.