Liverpool fapain indan a tum rih lo

Trent Alexander-Arnold-a'n Liverpool chhuahsana in hran chan tumna a la nei lo a, Anfield-a khelh chhun-zawm zel turin kum 2025 thleng atan contract thar a ziak.

Liverpool fan ni chunga seilian leh club academy chhuak ni bawk Arnold hian October 2016 khan Reds tana a match hmasa ber a khel a, inelna hrang hrangah match 179 khelin goal 10 a khung tawh a, assist vawi 44 a nei bawk.

Arnold chuan, "Club-in ka chunga rinna nghat a, contract thar min pe duh hi ka lawm takzet a, he contract thar ziak tur hian ka tan ngaihtuahna sen buai a ngai lo," a ti.

Champions League leh Premier League-a Liverpool champion puitu Arnold hi a contract thar avang hian club player hlawh sang zual Virgil van Dijk, Mohamed Salah, Sadio Mane leh Roberto Firmino te huangah a awm tawh nia sawi a ni.

Salah hian kar khatah £200,000 a hlawh mek nia sawi a ni a, Van Dijk leh Firminio hian kar khatah £180,000 an hlawha ngaih a ni thung.

Arnold chuan, "Chiang taka ka club hriat awmchhun chu Liverpool hi a ni a, hei leh chen he club-a awm a, rei zawk cham tura contract thar ziah theih hi keimah mai ni lo, ka chhungte tan pawh thu lawmawm a ni," a ti.

Hliam vanga Euro 2020-a inlan lo Arnold hian FIFA Club World Cup leh UEFA Super Cup-ah pawh Reds tan nomawi a lo chawi tawh a, kum 2019 khan Ballon d'Or dawng thei zingah chhawpchhuah a ni.

PFA Team of the Year (2018-19 & 2019-20) ah ṭum hnih a lang a, PFA Young Player of the Year (2019-20) ni tawhin UEFA Champions League Squad of the Season (2018-19) leh UEFA Team of the Year (2019) ah a lang tawh bawk.

Liverpool hian an player pawimawhte contract thar ziahpui chu tun nipui transfer-a thupui bera an neih a ni mek a, Alisson, Fabinho, Van Dijk, Salah, Mane leh Andy Robertson te pawh contract thar ziak thuai tura beisei an ni.