Djokovic-a'n medal a dawng lo

Golden Slam nih tumin Japan khawpui a pan a, mahse kut bengin a haw. Novak Djokovic chuan Tokyo Olympic 2020-ah medal engmah a hlawh chhuak zo lo - pathumna inchuh inkhelah a thinrim a insum zo lo bawk.

World number 1 hian singles semifinal-ah Alexander Zevrev a ngam lo. Bronze medal match-ah Pablo Carreno Busta nen inkhelin 6-4, 6-7 (6-8), 6-3 in a chak lo a, mixed dubles lama pathumna an zawn turah erawh a dar (shoulder) hliam vangin a inhnukdawk a ni.

Spanish tlangval Busta a hneh loh ṭum hian tennis court-ah Djokovic hi a thinrim a, a racket vaw chhiain a in hrosa. Nikum US Open khan Busta nen an inkhelh ṭum thoin line judge ball a vuak per tawh bawk.

Serbian tlangval Djokovic chuan, "Ka theihna zawng zawng ka hlan, medal lak ngei tumin thapui pawh ka thawh. Mahse chu chu a tawk zo si lo, ka thinrim ka insum zo ta lo a ni," tiin a chet dan maksak chungchang a sawi.

Kum 34 mi Djokovic hian season kal laiah - Australian Open, French Open leh Wimbledon te a la tawh. Olympic bakah US Open la leh thei se la chuan mipa tennis player zinga 'Golden Slam' hmasa ber a ni hial dawn.

Mahse, Japan khawpuiah hian singles bakah mixed doubles a khel kawp, khua a lumin nitin inkhelh a ngai ziah - ni khatah singles leh mixed doubles a khelh kawp a ngaih chang a awm, inelna tawp lamah a taksa in a tlin lo.

Grand Slam vawi 20 champion tawh Djokovic chuan, "Ram tana medal hlawh chhuah neih loh chu a hrehawmin a hrilhhai thlak takzet. Taksa leh rilru a hah a, duhthusam ang vekin a awm theih loh tih hriat thar lehna a ni bawk.

"Eng pawh kan chunga thleng thei a ni, medal la lo mah ila Tokyo Olympic ka khel hi inchhirna ka nei lo. Tun hmain Olympic-ah hian ka lo chak lo tawh ṭhin, khang ka chak lohna te khan player ṭha zawkah min siam a ni," tiin a hloh chu hlepah chhiar a tum.

Tokyo Olympic-ah hian Roger Federer leh Rafael Nadal te an inlan ve lo. Tun thla tawp aṭangin US Open an khel zui dawn, major title 20 ṭheuh nei tawh player ṭha pathum inum boruak hi a ngaihnawm chhunzawm dawn.