European Super League: Barca, Real & Juve kaltlang an tum
Barcelona, Real Madrid leh Juventus chuan thuchhuah inṭawm siamin European Super League an kaltlangpui tur thu an sawi a, hei hi court-a thiam an chan vang niin club pathum thuchhuah chuan a tarlang.
Commercial Court of Madrid chuan UEFA chuan European Super League dintute laka thubuai a siamsak chu titawp turin a ti a, an club hremte sum chawi tur euro maktaduai 100 bawr vel chu a thai bo sak bawk.
European club lian pathum chuan, "Court chuan European Super League huaihawt tumtute dilna chu a pawm a, UEFA ngenna erawh hnawlin court thu chhuak anga an kal a nih loh chuan hremna lekkawh a nih tur thu hrilh an ni thung," an ti.
He buaina hi a tawp mai erawh a rinawm loh - Barca, Real leh Juve chuan European Court of Justice, Luxembourg chuan an buaina hi an la en ve leh tur thu an sawi.
Ruahmanna thar
European club lian pathum chuan ruahmanna thar an neih thu an sawi a, a tira ESL thlawp lotute pawh thawhpui vek an inhuam thu sawiin ram FA, league, fans, players, manager leh club te chu rawn vek an nih tawh tur thu an sawi.
Club pathum chuan, "Kan hmalak zelna turah UEFA lam aṭanga vauna a awm tawh lo tur hian min tilawm takzet a ni. Chutihrual chuan kan ruahmannaah en ṭhat tur tam tak a awm tih kan pawm a, hei hi inrawnkhawmna leh sawihona aṭangin chinfel theih a ni tih kan hria.
"European Union hnuaia dan nena kal dun tlat chungin kan ruahmanna hi a hlawhtlin theih kan beisei tlat a ni," tiin ESL chu tawpsan mai an tum loh hmel hle.
ESL chairman leh Real Madrid president ni bawk Florentino Perez chuan a tira ESL zawmtu, mahse, chhuahsan leh ta club pakuate chuan contract an ziah vek avangin league chu an chhuahsan ngawt theih loh thu a lo sawi tawh.
UEFA a ngawi
Court-in ESL lam a awn tak avangin UEFA a ngawi a, he thu buatsaih a nih thleng hian European football-a thuneitu sang ber hian Barca, Real leh Juve thuchhuah chungchangah hian 'aw' an la chhuah rih lo.
Barcelona, Real Madrid leh Juventus bakah hian Manchester City, Chelsea, Manchester United, Liverpool, Arsenal, Tottenham Hotspur, Inter Milan, AC Milan leh Atletico Madrid te chu a tira ESL dintu zingah an tel.
Mahse, UEFA mai bakah fans tam takin ESL duh lohna an lantir avangin Barca, Real leh Juve tih loh zawng chu he league aṭang hian an inhnukdawk zui a, ESL awm tur thu puan a nih aṭanga darkar 72 chhungin league hi a tawp hman!
Mahse, club lian pathum leh court lamin thuchhuah an neih takah chuan ESL hi tawp hlen tawp tura ngaih a rem leh ta lo a, UEFA hian eng ang chiahin nge hma an lak ang tih chu thil hriat châkawm a ni ta.
