Biles inlan lo chhunzawm zel

American gymnast Simone Biles chu Tokyo Olympic neih laia chanchin duhawm lo nei hnem a ni mek. Inelna chi hnih aṭanga a inhnuhdawh tawh hnuah 'vault leh uneven bars final' aṭangin a inhnukdawk zui leh ta.

Kum 24 mi Biles hian Rio Olympic-ah khan USA tan gold medal pali ngawt a la, kuminah pawh a lakah beiseina a sang. Mahse, team inelna lamah a chet ṭhat loh vangin a inhnukdawk a, a inlan loh chhan hi a rilru lam hriselna a ngaih pawimawh vang niin a sawi.

USA Gymnastics chuan thuchhuah siamin, "Simone i lamah kan ṭang tlat a ni," an ti. Biles hian tun hma pawhin infiamna pawn lamah harsatna a lo nei zeuh zeuh tawh, tun hnaia rilru lam harsatna a nei leh hi thil thar a ni hran lo.

Biles chuan, "Inelna ka hmachhawn hmasa berah khan ka ti ṭha tawk lo tih chu ka hria, khami aṭanga huaisen taka thawh chhuah leh kha ka thil tum a ni. Mahse, duh leh beisei ang vekin thil hi a kal theih loh chang a awm.

"Infiammi kan ni a, mipui hmuh tura hmuhnawm chhawp chhuah pawh kan tih tur a ni. Mahse a chang chuan mihring kan nihna hi kan dah pawimawh a ngai, rilru hriselna hi ka ngaih pawimawh hmasak a ngai a ni," tiin a sawi.