USA tana point nei hnem ber Durant

Kevin Durant chu United States mipa bas-ketball team tana point nei hnem ber a ni ta. Durant hian Inrinni khan Czech Republic lakah point 23 neiin an ram hi 119-84 in hnehna an chan pui. Tokyo Olympic neih laiah quarterfinal an lut nghal bawk.

Brooklyn Nets forward hian ram tana point a neih tawh zat chu 354 niin, tun hma lama record lo awm tawh Carmelo Anthony (336 points) chu a rawn khum chiang ta hle, inelna a la zawh loh avangin a record hi a sawhnghet zel ang.

Kum 32 mi Durant hian an ram tan Olympic gold medal pahnih a hlawh chhuak tawh, kuminah hian an chesual hlauh a nih ngawt loh chuan gold medal an lak leh a rinawm, chutih rualin chetsual ve theih erawh a ni tih a lang tawh.

US hian an match hmasa berah France an hneh lo, vawi khat chesual zauh mah se an buai nawn tawh lo. Iran leh Czech Republic sawp chungin an tlang a, quarterfinal-ah pawh chak tura rinkai ber an ni leh tawh ang.

Group A inkhel dangah France chuan Iran 79-62 in an hneh a, group hmahruaitu ni chungin an tlang. Group B aṭangin Australia, Italy leh Germany an tling chiang tawh bawk - Group C an inkhelh zawh ve loh avangin quarterfinal-a intum tur a la hriat loh.