Gerrard-a Rangers-in chakin bul an ṭan

Steven Gerrard enkawlna hnuaiah Rangers an vul zel a, Scottish Premiership champion lai hian season thara an league match hmasa berah Livingston chu 3-0 in an sawp.

Rangers tan Ianis Hagi chuan minute riatna lekah goal hmahruai a khung a, Scott Wright leh substitute bench aṭanga luhtir Kemar Roofe ten goal khat ve ve khung leh bawkin Livingston lamin a chhanletna tur an nei lo.

Scottish Premiership-ah Rangers hi league match 40 chhung chu a zawnin an tlawm lo tawh a, an khelmualah match 20 chhung chu a zawnin league-ah an chak tawh bawk.

Rangers-in hnehna an chang chungin chanchin lawmawm lo hawn tur an nei a, kum 22 mi forward Hagi chu minute 31-na lekah hliam vanga lakchhuah a ni.

Hagi hi Romanian legend Gheorghe Hagi-a fapa a ni a, Thawhlehni zana Champions League third qualifying round an khelh huna a inlan theih dawn leh dawn loh a la chiang lo.

Rangers hian August 3 zan dar 10:30-ah first leg khel turin Malmo an lenchilh dawn a, Gerrard chuan, "Hagi hi a inlan theih loh a rinawm zawk," tiin a player chungchang a sawi.

Gerrard-a hoten hnehna an chan lai hian an elpui ber tura ngaih Celtic erawh an match hmasa berah an tlawm nghal a, an mikhualna ramah Hearts chu 2-1 in an ngam lo.

Coach thar Ange Postecoglou hnuaia bul ṭan Celtic hian minute riatna lekah goal an chhuah nghal a, Hearts winger Gary Mackay-Steven chuan Celtic barakhaihin goal hmahruai a khung.

Celtic tan Anthony Ralston chuan si phurh sut mah se Hearts-in hun tawp nan minute khat chauh a awm tawh tihah John Souttar hmangin an khung ve leh a, hun a tawp meuh chuan 2-1 in Hearts an chak - kum 24 hnua a vawi khat nan Scottish Premiership khelh ṭan niah Celtic an tlawm.