Leigh Wood-a'n Xu Can a barakhaih

British boxer Leigh Wood chuan WBA featherweight title hlawh chhuak turin Chinese boxer ṭha Xu Can chu round 12-naah technical knockout hmangin a hneh a, boxing khawvel a barakhaih.

Kum 32 mi Wood hi Xu Can nen an inhmachhawn hma hian kar ruk chiah inbuatsaihna hun pek a ni a, mahse, heti chung hian boxer ṭha zawka ngaih Xu Can a hneh.

Wood hian round 12-naah Xu Can-a khabe chu chiang zetin a hnek fuh a, Chinese boxer a tlu. Xu hi tho leh vat mah se English boxer hian lo hnek chhunzawm nghalin a inveng seng tawh lo a, referee-in inhnek a titawp zui - beisei loh zawk Wood

a chak.

Nottinghamshire tlangval Wood-a'n inhnek a hmachhawn tawh vawi 27-a vawi 25 hnehna a channa a ni a, vawi hnih a tlawm tawh thung. A hneh tak Xu Can hian WBA (Regular) featherweight title hi January 2019 khan Jesús Rojas lakah a hlawh chuak.

Puerto Rican boxer a hneh hnu hian Japanese boxer Shun Kubo leh American boxer Manny Robles III te hmachhawnin a title a humhim a, Wood-a lakah erawh a humhim zo ta lo.

Kum 27 mi fighter hian vawi 21 fight a hmachhawn tawha vawi thum a tlawmna a ni a, vawi 18 dang a chak thung - a hneh loh zingah hian June 2014-a Indian boxer Neeraj Goyat a hneh loh chu a tel.

Wood leh Xu-a inhnekna hi Matchroom Boxing Fight Camp series a ni a, Chris Billam-Smith chuan British leh European Cruiserweight title hlawh chhuak turin Tommy McCarthy a hneh a, Anthony Fowler chuan Rico Mueller chu round riatnaah a hneh bawk.

Campbell Hatton-a'n professional boxing-a luhchilh hnua a vawi thum chakna ni turin Polish boxer Jakub Laskowski a hneh a, Jack Cullen chuan IBF international super-middleweight title hlawh chhuak turin Avni Yildirim chu unanimous decision-in a hneh bawk.